Shillong, Jymmang 06 : U Symbud Myntri Rangbah ka Jylla ba khmih ia ka Tnad Pulit Bah Prestone Tynsong, hynne ka sngi Saitjain, ula pan kaiphod halor ka jingkynnoh siat iap ki shipai BSF ia uwei u rangbah ha ka shnong Mawshun ha ka miet sngi Thohdieng.
“U Investigation Officer (IO) ula leh ia ka kam. U SP ula leh iala ka kam ban ioh ia baroh ki jingtip ba bniah ba kumno kane ka jia. Nga la bthah ia ki ba hapoh ka sngi Nyngkong, ka kaiphod ka dei ban poi ha ka miej jong nga” ong u Bah Prestone haba iakren bad ki nongthoh khubor.
U Bah Prestone ula ong ba ula dep phah ia ka kynhun bad la bthah ruh ia u SP ban pyndep kloi bha ia ka jingtohkit halor kane ka jingjia.
Uwei u rangbah ba 35 snem ula shah siat iap ha ki shipai BSF ha shnong Mawshun,East Khasi Hills ha ka miet sngi Thohdieng ha ka por 11 baje mynmiet.
Haba kylli, u Bah Prestone ula ong “Kane ka dei kaba nga ong ba na ka liang ki BSF kila ong ba la iohi kum ka trok kaba kot muid ne masi hynrei kumba nga ong ha phi ba ngam lah ban kynthoh eiei katba ngam pat ioh pdiang ia ka kaiphod jingtohkit”.
U ong ba hadien ka jingioh pdiang ia ka kaiphod un sa lah ban ong eiei ia ka sienjam ban shim kat kum ka lynti ka ain.
La ka Sorkar kan thung ia ka jingtohkit ba kyrpang halor kane ka jingjia, u Bah Prestone ula ong “Ia mynta, tang u OC Inchage bad uwei u IO kila tohkit ia kane ka kam. Ia mynta, ngan nym ong eiei la ngin thung ne em ia ka jingtohkit ba kyrpang namar kane ka dang shu jia..ta ka daw nga kwah ban tip shuwa ia kaei kaba jia bad ha ki sdang jong ka taiew ban wan, ngan sa lah ban ioh ia baroh ki jingtip”.
