Shillong, Jymmang 09: Ka National Testing Agency (NTA) ka dang pan kaiphod naka Sorkar Jylla halor ka jingkynnoh ba ka don ka jingbakla haka por ba pynlong iaka eksam NEET ha Jowai bad Nongpoh.
Ia kane la iathuh daki samla ba ialeh iaka eksam NEET hadien ka jingkynduh ia u Myntri ka tnat pule Rakkam A Sangma.
Haba kren shaki lad pathai khubor ,u samla Nangbha Suchiang ula iathuh u Myntri ula phone ia u Director ka NTA hakhmat ki samla, ban pan jingpynshai halor ka jingkynnoh ba mih ka jingleh bakla haka por pynlong iaka eksam NEET ha Jowai, West Jaintia Hills bad Nongpoh, Ri-bhoi district.
“Ngi la pynsngew iaki jingeh ba ngi mad haka sngi pynlong iaka eksamin NEET bad u Myntri ula shimkhia halor kane bad iaka ba mynta, u Director ka NTA ula pan iaka kaiphod naka Sorkar Jylla hashuwa ban shim rai” ong u samla Nangbha.
U samla Nangbha ula iathuh ba haka sngi pynlong iaka eksamin NEET, ki nongpyniaid iaka eksam kila sam ar tylli ki kot jingkylli, kata ka MNOP bad QRST.
Ula iathuh ba nyngkong ki bor khmih iaka eksam kila bthah iaki samla ban thoh daka kot jingkylli MNOP hynrei hadien kumba 40 minit bala iaid ka eksamin, ki bor pyniaid kila kam ba ka kot jingkylli ka bakla bad kaba dei, kadei ka QRST.
“Kane kala pynkulmar khlieh ia ngi namar ngi la pynlut por haduh 40 minit ban thoh iaka eksam daka jingkylli MNOP. Namar kane ngi dawa na u Myntri ban iakren bad ka NTA ba kan pynlong biang da kawei pat ka eksamin NEET” ula ong.
