Pan kaiphod ka MHRC na u SP ba kynnoh shah pynshiton be-ain u samla ha Sohra PS

Shillong, Naitung 09 : Ka Meghalaya Human Rights Commission (MHRC) kala bthah ia u Superintendent of Police (SP) ka East Khasi Hills, ba un aiti ia ka kaiphod hapoh ka 31 tarik Naitung halor ka jingkynnoh shah pynshitom beain u samla hapoh Sohra Police Station.

Haba pyntip ia kane ha ka sngi Ba-ar, u Chairperson ka MHRC (Retd) Justice T Vaiphei ula ong ba ka Commission kan sa shim ia ki sienjam ba dei ban shim hadien ba ka ioh pdiang ia ka kaiphod na u SP.

Ka Commission kala ioh pdiang ia ka jingujor ha ka sngi Nyngkong na ka kong Mildred Jyrwa ba kynnoh ba u Khun jong ka, ula shah shoh dusmon bad pynshitom beain ha Sohra Police Station.

Ka Commission kala bthah ia u SP ka East Khasi Hills ban aiti ia ka kaiphod halor kane ka kam hapoh ka 31 tarik Naitung.

Ha ka sngi Nyngkong, ka kong Mildred Jyrwa, Kmie u samla Getwin Jyrwa ba 19 snem, kala leit buh ia ka jingujor bad u Superintendent of Police ka East Khasi Hills lem bad ka Meghalaya Human Rights Commission (MHRC) ba kynnoh iuhroit ia ka hok longbriew bad pynshitom be-ain ia u Khun da ki Pulit hapoh ka Sohra Police Station.

Kat kum ka shithi ujor, ha ka 3 tarik Naitung, 2025, ka kong Mildred kala leit buh ia u Khun ha Sohra Police Station hadien ka jingtip ba ki Pulit kila wad ia u. Hynrei, ynda kala leit shaw ia u ha ka por janmiet, kala kyndit ban iohi ia u hapdeng ka jingmynsaw kaba jur.

Ia u Getwin la ialam noh mar mar sha Sohra CHC bad hadien la pynkit noh ia u sha Shillong Civil Hospital ban ioh ia ka jingsumar ba kham paka.

Ka Kong Mildred kala pynpaw ba lada u khun jong ka, u leh ia kano kano ka kam bymman, ki Pulit kila dei ban bud ia ki lynti jong ka ain, ka bym shym la jia satia ha kane ka jingjia.

Ka kynnoh ba ka jingpyllait ia u Getwin ha kane hi kajuh ka sngi ryngkat ki jingmynsaw, ka pyni ba ki Pulit ba donkti ban pynshitom tohmet bha, ban iuhroit ia ka hok longbriew u khun jong ka.