Shillong, Jymmang 01 : Ka Meghalaya Human Rights Commission (MHRC) kala pan kaiphod na u Director General of Police (DGP) halor ka jingiap jong u Nongialam ka kynhun kiengatiar, hapoh ka along ki Pulit ka Khanapara Police Station.
Kat kum ka jingpyntip u Superintendent ka MHRC, la iathuh ba ka MHRC kala shim suo moto case halor ka jingiap jong u Rudra Rabha ha Khanapara Police Station, Ri-Bhoi District, kaba jia ha ka 26 tarik Iaiong.
Kumta ka Commission kala pan ia ka kaiphod na u DGP kat kum ki kyndon jong ka National Human Rights Commission (NHRC) ban aiti ha lane shuwa ka 17 tarik Jymmang.
U Rudra Rabha u dei u nongialam jong ka kynhun ki runar ba kiengatiar, uba la shah kem ha ki Pulit halor ka case Arms act myn ha ka 24 tarik Iaiong.
Une u briew ula dkhat jubor iala ka jingim da kaba sdien phasi hapoh along ki Pulit ka Khanapara Police Station kaba la jia ruh tang da ki kynta hadien ka jingleit ialam lynti ban kurup ia ka tiar siat jong u hapoh ka khlaw Ranibari.
