Shillong, Naiwieng 17 : Ka Iingkashari Meghalaya High Court ha ka sngi Thohdieng, kala pan kaiphod halor ka jingdon ki case kam bymman ba dang shteng pyrshah ia ki MP bad ki MLA hapoh ka Jylla.
Ka Iingkashari kala shim da ka suo-moto case bala ai kyteng In-re: Designated Courts for MPs/MLAs ban pyndep noh ia ki jingbishar, la register haba pyntreikam ia ka hukum jong ka Iingkashari Supreme Court ba mih ha ka 9 tarik Naiwieng, 2023.
Ka hukum bala pynmih da u Chief Justice (Acting) HS Thangkhiew kala ong ba halor ka jingbthah ia ka Sl (iii), (iv) badd (vi), la bthah ia ki District and Session Judge jong baroh ki District ba kin aiti ia ki kaiphod halor kino kino ki case kam bymman ba dang sahteng ha ki Iingkashari jong ki.
Kat kum ka jingbthah ka Iingkashari Supreme Court, ki High Court ki lah ban bthah ia ki Principal District and Session Judge ba kin phah ia ki kaiphod ha kano ka khep ba donkam namar ka long kaba donkam ban pyndep sted ia ka jingbishar.
Ka Iingkashari Supreme Court kala bthah ruh ba ki Iingkashari ba bishar ia ki case ba ki dei ban buh hakhmat eh ia .. “(i) ba nyngkong eh ia ki kam bymman pyrshah ia ki MP bad MLA kiba lah ban pynsajia da ka jingiap ne set along shirta bad hadien ka (ii) ki case ba lah ban pynsajia da ka jingset along ba 5 snem lane palat bad hadien ia ka (iii) kiwei ki case. Ki Iingkashari kim dei ban pynjlan ia ki case lait noh tang ha ki daw ki bym lah ban iaid lait”.
