Shillong, Jymmang 08 : Ka Iingkashari Meghalaya High Court ha ka sngi Palei, kala bthah ia ka Sorkar Jylla ba kan aiti ia ka kaiphod kaba pynpaw ia ka jingdon ka jingtyrwa ban nang pynbun ia ka jingdon ki Lum Jingtep na ka bynta ki riewngeit jong ka balang Khristan.
Ka Iingkashari ba kynthup ia u Chief Justice IP Mukherji bad Justice W Diengdoh kala ong “La bthah ruh ia ka Sorkar ba kan file ia ka kaiphod kaba pynpaw la ka don ne em lane thmu ban tyrwa ban pynbun ia ki Lum Jingtep na ka bynta ki riewngeit Khristan”.
Ka Iingkashari haba bishar ia ka PIL halor ka kam ban thang ia ki metiap jong ki briew kiba dei na ki Jaidbynriew Khasi bad Jaintia bad ruh kito kiba ngeit ia ka niam Hindu hapoh ka Jylla, kala rai ban pyniar ia ka jingbishar ha kaban kynthup lang ia ki riew ngeit Khristan hadien ba shim judicial notice ia ka jingtop ba bun ki Balang Khristan kila mad ia kajuh ka jingeh ha kaban tep ia ki metiap ha ki Lum Jingtep.
“Ka Lum Jingtep ba pyniaid da kawei ka Balang kam ju shah satia ban tep ia ki metiap jong ki briew kiba dei na kiwei pat ki Balang. Ka jingmih ka long ba ha ki thain bapher bapher ka Jylla, ki ju mih ki khep ba ki bahaiing hasem jong ka Iing ba iap, ki hap ban iaid ia ka lynti kaba jngai ban leit pyndep ia ka lehniam lehrukom ba khatduh ia kiba iap. Ka long ka jingdonkam ba kumjuh ban iatep lang ia ki metiap ha kajuh ka Lum Jingtep bad ban ai jaka ban pynlong Lum jingtep ia ki riewngeit Khristan” kala ong.
Ka Iingkashari kala bthah ia u Amicus Curiae N Syngkon ban pynlong ia kum kajuh ka jingialang bad ki District Magistrate bad ruh ki dkhot jong ki Jaidbynriew bapher bapher ban pynbeit ia ki jingeh bala mad da ki paid Khristan bad ban aiti ia ka kaiphod.
Ia mynta, ngi la bthah ia u Amicus Curiae ba ngi la thung ban pynlong ia ka jingialang bad ki District Magistrate lem bad ki nongmihkhmat na ki Niam bapher bapher ba kin iapynbeit ia kane ka kam kynthup ban iapyndonkam lang ia ka jaka thang briew.
Ha kajuh ka por, ka Iingkashari kala pynlong liang mamla ia ki lai tylli ki Autonomous District Council– Khasi Hills Autonomous District Council, Jaintia Hills Autonomous District Council bad Garo Hills Autonomous District Council.
