Shillong, Naiwieng 19 : Ka Iingkashari Meghalaya High Court ha ka sngi Ba-ar, kala hukum ia ka Sorkar Jylla ban aiti ia ka kaiphod halor ki sienjam ba kala shim ban iada ia ka wah Myntdu ha Ri-lum Jaintia.
Ha ka hukum ba pynmih hadien ba shong bishar ia ka PIL, ka Iingkashari ba kynthup ia u Chief Justice Indra Prasanna Mukherji bad Justice W Diengdoh kala ong “La bthah ia u Amicus Curiae ban ai ia ka kaiphod hapoh ka 28 tarik Rymphang 2025. Ka Sorkar kan hap ban ai ia ka kaiphod ba pyni ia ki sienjam ba kala shim bad ruh ban iaid kat kum ka kaiphod jong u Amicus Curiae hapoh ka 13 tarik Lber, 2025”.
U Amicus Curiae P Yobin, ha ka kaiphod ka jingleit jurip lang , ula batai bniah bha ia ka jingkongsan jong ka wah Myntdu kaba tuid lyngba ka ri-lum Jaintia sha Bangladesh.
Kala ai um ia ki artylli ki lum ba seisoh ha ka rep ka riang ha kane ka thain-ka Pynthor Nein bad Pynthor Wah, kaba la pyn im jai a palat 40,000 ngut ki briew. Ia kane ka wah la mane kum ka Blei bad niew ia ka kum ka Tawiar Takan da ki trai shnong.
Ka jingeh bala pynpaw ha ka jingujor ka long ba ka Sorkar kala ai jingbit ban pyntrei ia ki jingtei harud jong ka Wah. Kum kine ki jingtei kila mih pathar kaba lam sha ka jingwan tuid ki jakhlia sha ka wah. Kaba ar, ka Sorkar kam shym la shim ia ka sienjam ba donkam ban khang ia ka jingrong ka Wah ia ka khyndew kaba lam sha ka jinglang jong ki jakhlia ha wah. Kine baroh kila khang ia ka jingtuid bha jong ka um sha ki jaka rep, ban dih bad kiwei kiwei ki jingdonkam.
