Shillong, K’lyngkot 29 : U Myntri Rangbah ka Jylla Conrad K Sangma ha ka sngi Palei ula iakynduh ia u Myntri Rangbah Duh ka Ri bad iakren halor ka lynti iaid jong ka Jylla ha ka liang ka roi ka par bad pan ia ka jingkyrshan ba khlem sangeh na ka Sorkar Pdeng.
Haba batai ia ka Vision 2032 ka Sorkar, u Conrad ula kyrpad ia ka Sorkar Pdeng ba kan mynjur ha kaban ai ia ka Externally Aided Project (EAP) ba kot ia ka T.15,000 klur, pynkiew ia ka bhah khajna bad 1% ka bhah kyrpang sha ki hynniew tylli ki Jylla ba rit ka thain Shatei Lam Mihngi, nalor ban ai ia ka grant tei jingtei ba manla u snem kaba kot T.14,000 klur na ka bynta san snem ban lah tei ia ki jingtei kiba kongsan lyngba ka Sixteenth Finance Commission.
U Conrad ula pynpaw ruh ba ka EAP ka long kongsan ia ka roi ka par ka Meghalaya, ka ban pynlah bad pynbteng ia ka jingkynshew ia kiba ka mang tyngka ba manla u snem kam lah kyrshan satia, haba wanrah ia ki jingkylla kiba khraw bad ki jingtei kiba kongsan ha ki bynta bapher bapher.
U ong ba ha kine ki shiphew snem bala leit, ka EAP kala ai ia u soh ki jingkylla kaba khraw-na ka PES prokram ba heh duh ka India bad ka jingpynbha biang ia ki jaka ba don par dewiong sha ka jingiarap ia ki nongrep, ka jingpynjanai ha ka liang ka jingpynmih bording, ka koit ka khiah, ki surok bad ka pule puthi ha ki kyrdan ba shajrong.
Ka Meghalaya ka pyntrei mynta haduh 15 tylli ki EAP bad sa artylli ki project hapoh ka jingpynbeit da ka ram. Ka jingshong dor jong kine ki project ka kot ia ka T.12,166 klur, bad ka ram pat ka long T.9,126 klur nalor ka pisa bynrap ba T.15,000 klur jong ki project ba kongsan kiba la pynkhreh ban pyntrei hapoh ka por treikam jong ka Sixteenth Finance Commission.
