Shillong, Nailur 27 : Ka Iingkashari Meghalaya High Court ha ka sngi Balang, kala bthah ia ka Sorkar Jylla ba kan aiti ia ka kaiphod jong ka Comptroller and Auditor General (CAG) halor ki jingbym biang ha ka jingtreikam jong ki Weighbridge ha ka Jylla kaba lam sha ka jingbym lah kem ia ki trok kiba kit palat pud.
Haba shong bishar ia ka PIL, ka Division Bench kala ong “Watla ka Jylla haba kdew ia ka hukum ba 23 tarik Nailar, 2023, bala pynmih ha ka PIL No 1 of 2022, la paw ba ka don ka jingleh bym biang kaba khraw bha ha ka rukom treikam jong ki Weighbridge ha ka Jylla bad ka jingbuh jingkylli halor ka jingbym lah kem ia ki trok ba kit palat pud bala kdew ha ka kaiphod ba dang shen jong ka CAG”.
Kala ong ba namar kane, la aibor ia u nongmudui ban pynshisha bad ban pynpaw ia ki jingduna jong ka Sorkar Jylla ha ka sngi ba shong bishar biang ia ka mukotduma ka ban long hadien lai taiew.
“Ka Sorkar Jylla ruh kan aiti ia ka kaiphod jong ka CAG kat kum ki sla bala thoh halor kane ka kam” ong ka Iingkashari.
Ia ka kaiphod CAG la wanrah ha ka Dorbar Synrai ba dang shu kut jong ka Iingdorbar Thaw Ain ka Jylla, kaba pynpaw ba ka Tnad Transport kam shym la lah ban lum ia ka khajna kaba kot haduh T. 23.75 klur.
