Shillong, Risaw 15 : Ka Committee ba thung da ka Sorkar, kaba la khlieh da u Director ka Tourism Bah Cyril Diengdoh, ha ka sngi Ba-ar, kala bthah ia baroh ki kynhun ba trei ia ki kam jngohkai pyrthei ba kin aiti ia ki jingai jingmut da ka jingthoh shuwa ban shim ia kano kano ka rai ha kaban pynbeit ia ki jingeh ba ki iakynduh.
Ka Committee kala rai ruh ban pynlong la ka jong ka jingialang bad ka All Khasi Meghalaya Tourist Taxis Association (AKMTTA) hadien ba ka kyntait ban iashimbynta ha ka jingialang ba nyngkong jong ka Committee kaba long hynne ka sngi ha State Convention Centre.
Ha kane ka jingialang la wan ban iashimbynta da ki kynhun bapher bapher kynthup ki Seng jong ki nongniah taxi, ki tour operator, ki trai hotel bad kiwei kiwei.
Haba iakren bad ki nongthoh khubor hadien ka jingialang, u Bah Cyril ula ong “Kane ka dei ka jingia lang ba nyngkong jong ka Committee bala thaw da ka Sorkar ban pynbeit ia ki jingeh jong kine ki seng. Ngi la khot ia baroh ki kynhun ba trei ia ki kam jngohkai pyrthei. Baroh kila wan bad ai ia ki jing ai jingmut. Ngi la bthah ia ki ban ai ia ki jingai jingmut jong ki da ki jingthoh”.
U pyntip ba lai tylli ki seng jong ki Tourist taxi- ka Meghalaya Tourist Transporters Association, All Shillong Tourist Taxi Drivers United Organization bad Khasi Hills Tourist Taxi Association, kila wan iashimbynta ha ka jingialang lait noh ka AKMTTA kaba la pep.
“Nga tharai ka AKMTTA ka kwah ban shong la ka jong ka jingialang. Ngin sa leh ia kata. Ngin sa khot ia kiwei ruh. Kam don jingeh ia kata” ula ong haba bynrap ba ka Committee kan sa pynmih shen ia ka notice halor kane ka kam.
Haba kylli, une u Director ka Tourism ula ong ba ka Committee ka shong bishar ia baroh ki jingai jingmut jong ki kynhun bapher bapher. Kawei na ki, ka dei ka jingpyndonkam ia ki kali shimet kum ki taxi.
“Ngi dang ap ia ki jingai jingmut bad ngin sa shim ia ka rai halor kane ka kam” ula bynrap.
