Shillong Jymmang 24: Namar ka jingiakynad bad jingiaumsnam haka jylla Manipur kaba la khie naduh ka 3 tarik u Jymmang 2023, ka North East Congress Coordination Committee (NECCC) kala buh jingkylli halor ka jingbym iohi ia u Myntri ka Sorkar Pdeng ban khmih ia ka jylla Manipur ba un leit iuhkjat ha kane ka Jylla watla ka BJP ka ju kam ba kadei ka sorkar kaba don ar tylli ki enjin.
U Pradyut Bordoloi u Convener jongka NECCC bad u MP Diganta Chaudhury uba long u General Secretary, NECCC kila pynpaw ba naduh ba kala sdang ka jingiakynad ha Manipur, kan dei ka sien ba nyngkong ba u Mynti Kam Pohiing ka ri u Amit Shah yn leit jurip iaka jylla Assam haka 25 tarik u Jymmang.
“Ka Manipur kala don hapdeng ka jingeh kaba khraw hadien ba la mih iaka jingkynad hapdeng ki jaidbynriew bad kala don ka jingthang ia ki iing ki sem, ka jingshah thang bad jingshah pynjulor ki iingmane bad ki jaka mane Blei hynrei ka sorkar pdeng kala shu kylla long tang ka nongpeitkai kaba jar jar ia kitei ki jingjia baroh kaba la pynlong ia ki phew hajar ngut ki briew ban phetwir kaba la poi shaduh u pud ban duh iaki 73 tylli ki jingim briew, ka jingduh ia ki jingdon jingem” kala ong.
“Kaba lyngngoh ka long balei ka sorkar pdeng ka kyntait ia ka Manipur” la buh jingkylli ki nongialam ka NECCC haba pan jubab na u Myntri Kam Pohiing ka ri, ba ka Manipur kadei ka sorkar kaba don ar tylli ki enjin hynrei ym la don satia wat tang uwei u Myntri ka Sorkar Pdeng ban leit jurip ia katei ka jylla ne ban shimkhia ha kaban tehlakam iaka jingiakynad hapdeng ki jaidbynriew.
Nalor kane la buh jingkylli ruh ba lano ka Sorkar Pdeng kan weng noh iaka jingkhang pyntreikam iaka Internet kaba la ktah jur bha iaka pule puthi, ka jingtreikam ki Bank bad kiwei kiwei ki rukom ai jingshakri kiba kongsan ia ki paidbah.
Ka NECCC kala kylli ruh, kaei ka nongrim jongka sorkar pdeng ha kaba iadei bad ka dorkhas kaba la aiti haka 15 tarik u Jymmang da ki 10 ngut ki Kuki MLA kiba kynthup ia ki 7 ngut na ka seng BJP bad 2 ngut ki Myntri Sorkar.
Nalor kane kala kylli ruh kiei ki sienjam kiba la shim ha kaban ioh biang ia ki 1,420 tylli ki tiar siat kiba la shah lute na ki pulit naduh ba sdang katei ka jingiakynad jaidbynriew bad lano yn pynlong noh iaka jingiakren iasuk hapdeng ka 24 Kuki – Zomi ki kynhun kieng atiar hapoh jongka Suspension Of Operation (SOO)?
Ki nongialam ka NECCC kila buh jingkylli ruh ba lano ka Home Ministry kan sdang iaka jingbhah iaka bai lutksan na ka bynta kito kiba la duh iala ki jingdon jingem na ka jingiakynad ha ka jylla Manipur?
Ka North East Congress Coordination Committee kan shim ia ki lad ki lynti ban weng ia ki jingiakynad bad ka jingiangewpher jaidbynriew ha Manipur.
