Shillong Jymmang 24: Ka Department of Surgical Oncology jongka NEIGRIHMS, Shillong ryngkat bad ka Department of Community Medicine bad Northeast-India Association of Surgical Oncology (NASO), hynne ka sngi kila pynlong ia ka jingiasyllok bad ki Nongialam Niam ban iatreilang ha ka ban iakhun iaka jingkynrei ka jingpang bampong (cancer) ha ka jylla Megalaya bad ban shim ia ki lad ki lynti ban tehlakam ia kane ka jingpang.
Ha katei ka jingiasyllok la wan ban iashimbynta da u Dr. Nalin Mehta uba long u Director jongka NEIGRIHMS, u Sampath Kumar u Principal Secretary ka tnad ka koit ka khiah ka jylla Meghalaya ryngkat bad ki nongialam niam haka kynhun Shillong’s All Faiths Forum.
La sdang ia kane ka jingialang da ka jingpyni ia ki jingtip bad ki jingkhein halor ka jingkiew jong ka jingioh iaka jingpang bampong ha ka jylla bad ia ka jingdonkam kyrkieh ban leh eiei ia kane ka jingeh kaba khraw bad la ioh ruh ia ki jingpynsngew kaba bniah na kito kiba la lait im na ka Cancer bad ki bahaiing bahsem jong ki nongpang Cancer kiba la batai iaka jingshah ktah jong kin a katei ka jingpang.
Ki nongiashimbynta kila pynpaw ba ka long kaba kongsan ban shim ia ki lad jingiada kum kata ka sienjam ban iakhun iaka bampong bad ia ka jingdonkam ban lap noh mardor ia katei ka jingpang bad ban ithuh kloi ia ki dak ki shin jong katei ka jingpang bad ban sam ia ki kot ha ka jylla ban pyni ia ki video ha ka ktien Khasi bad English ban pynsngewthuh ia ki paidbah.
Nalor kane la ai jingmut ruh ban ithuh ia ki kynhun niam bad ki balang ban pynlong ia ki jingialang kiban pynleit jingmut ha kaban iada bad ban ai jingsumar iaka jingpang Cancer.
Nalor kane, la ban jur iaka jingdonkam ia ka jaka ai jingsumar kaba paka iaka jingpang Cancer khnang ba ki nongpang kin ym donkam shuh ban leit phah sumar sha kiwei pat ki jylla.
U Dr. Nalin Mehta, ula ong ba ka long kaba kongsan ban pynsngewthuh ia ki paidbah hynrei dei ban pynthikna ba katei ka rukom pynsngewthuh kadei ban long kaba ngam ha ka jingmut jingpyrkhat ha kaba iadei bad ka Cancer.
Nalor kane la ai jingiaroh ruh iaka sienjam kaba la shim lyngba ka Tobacco-Free Educational Institutions (ToFEI) program, kaba la bei tyngka da ka sorkar jylla ryngkat ka jingiatreilang bad ka NEIGRIHMS bad Sambandh Health Foundation bad ka long kaba donkam ban pyniar shuh shuh ia kane ka prokram ha kylleng ki jaka na ka bynta ban wanrah ika jingkylla.
Katba u Sampath Kumar ula pynpaw iaka jingeh ban poi shaduh ki 7,000 tylli ki shnong kiba don ha ka thain bad ula pynpaw iaka jingdonkam ba ka imlang sahlang kan don bynta lang, ka jingai jingshakri ki doctor, Village Health Council (VHC) bad ki Self-Help Groups (SHG) ha kaban iada iaka jingpang cancer bad ula pynpaw iaka jingdonkam ban iatreilang bad ki khynnah shynrang khamtam ha kaban shimkhia iaka jingpang kaba iadei bad ka pyrkhat pyrdain bad ban ai jingkyrshan lem ia ki.
Ka Meghalaya kadei ka jylla kaba jur bha ha ka jingioh ia ka jingpang Cancer ha ka ri India bad nalor kane, ka jylla kadei ruh kaba jur bha haka jingpyndonkam ia u duma ha kaba 47% kidei ki samla (katkum ka Global Adult Tobacco Survey, 2016-17) bad 34% kiba haka rta 13-15 snem (katkum ka Global Youth Tobacco Survey, 2019) ha kaban pyndonkam ia u duma ha kiba bun rukom.
Ka Esophageal Cancer kadei ka jingpang kaba jur tam hapdeng ki nongshong shnong ha ka jylla kaba la ktah iaki 71.2 per lakh ngut ki paidbah bad kane kala long palat ruh iaka National Average kaba long palat 10 shah bad ka long ka mat kaba sngewkhia bha iaka jylla.
