Shillong, Risaw 26 : Ka Bharatiya Janata Party (BJP) hynne ka sngi Balang, kala ai show cause notice ne pan jingpynshai na u Bah Micheal Kharsyntiew halor ka jingkyntu ia u Vice President barim Bah JA Lyngdoh ba um dei ban iakhun shuh ia ka elekshon MLA-2023 na North Shillong Constituency.
Ia kane ka shithi pan jingpynshai la phah da u President ka BJP-Meghalaya Bah Ernest Mawrie uba la iathuh ba ka jingpan jingpynshai ka long namar ba u Bah Micheal ula ialam bakla lyngba ka jingkren sha ki lad pathai khubor da kaba kyrpad ia u Bah J A Lyngdoh ba un wanphai biang sha ka BJP bad ba um dei ban iakhun ia ka elekshon 2023.
Ka shithi ka kren shai ba u bah Micheal udei ban pynshai, balei ka party kam pynshitom ia u namar ka jingialam bakla jong u iaki prokram ka party daka ba kren sha ki lad pathai khubor khlem da ioh jingbit naka party.
La kyrpad ba u bah Micheal udei ban phah ia ka jubab hapoh ka hynniew sngi naduh ka sngi ba la pynmih ia kane ka jingpyntip.
Lah ban kdew ba dang shen ka kynhun u bah Micheal Kharsyntiew kala kren sha ki lad pathai khubor haba iadei bad ka jingpynkhreh ka BJP iaka ilekshon 2023 bad ha kane ka sngi u bah Micheal ula kyntu ruh ia u bah J.A Lyngdoh uba la phet na ka party ban wanphai biang shaka party ban kyrshan ia u kyrtong ka BJP na North Shillong konstitwensi haka ilekshon ban wan.
