Shillong, Naiwieng 29 : Ka National Human Right Commission (NHRC) hynne ka sngi ba-ar kala shimkhia ia ka jingshah ther kuli ki paidbah ha ki Pulit Assam ha Mukroh, West Jaintia Hills bad bthah ia u Home Secretary ka Sorkar Pdeng bad Chief Secretary ka Assam ba kin ai jingmut kumno ban khanglad noh ia kum kine ki jingjia ha ki jaka iakajia pud jong ki Jylla.
Kane kala mih hadien ba ka Sorkar Jylla dang shen kala aiti ia ka dorkhas ha ka NHRC ba kan tuklar ia ka jingshah siat iap ki hynriew ngut kynthup ia 5 ngut ki paid Khasi bad uwei u Forest Guard ka Assam ha ki Pulit ka Assam bad Forest Guard, kaba jia myn ha ka 22 tarik Naiwieng ha shnong Mukroh, West Jaintia Hills.
Ka kyrwoh bala pynmih da ka NHRC ka ong ba ka Commission kala sngew ba kane ka jingjia kala jia namar ka jingiakajia pud hapdeng ki artylli ki Jylla –ka Assam bad Meghalaya, kaba dei ka kam bala sahteng la slem.
“Haba peit, la iohi ba jin ba ia kane ka jingiakajia la dep pynbeit, kum kine ki jingjia kin ym jia satia. Watla ka lah ban dei ka jingiakajia hapdeng ki Jylla, ki Pulit ki hap ban tyngkan ha kum kine ki khep. Namar kata, donkam ban hap bishar ia ka SOP ba treikam, lada don, halor ka jingther kuli da ki bor Pulit ha ki jaka ba don jingiakajia hapdeng ki Jylla bar marjan” kala ong.
Namar kata, ka Commission kala phah ia ka dorkhas sha u Home Secretary ka Sorkar Pdeng bad sha u Chief Secretary ka Sorkar Assam.
“Ki dei ban shong bishar bad sei ia ki lad ki lynti/ban ai jingmut kumno ban khanglad ia kum kine ki jingjia, khamtam ha ki jaka kiba don hapdeng ki jingiakajia pud. La khmih lynti ba kin ai jubab hapoh ka artaiew” kala ong.
Ka kyrwoh ka ong, ba ka jingkynnoh ka mih ba ki Pulit ka Assam bad Forest Guard kila kthong ia kawei ka trok kaba kit dieng bad ia kane ka trok la ioh ban bat ha shnong Mukroh da kine ki bor ka ain.
Ki Nongshongshnong ka Mukroh kila kem bitar halor ka jingwan rung ki Pulit ka Assam ha ka shnong jong ki. KIla ker kut ia ki Pulit ka Assam bad Forest Guard, kaba lam sha ka jingther kuli.
Ha kane ka jingjia, saw ngut kila iap hashen katba saw ngut na ki nongshongshnong kila mynsaw jur bad poi hospital. Na kine, arngut kila iap noh ha hospital.
