Shillong, Iaiong 24: Ki saw tylli ki sengbhalang ka jylla kiba kynthup ia ka HNYF, KSU, FKJGP bad Maitshaphrang kila kyntu iaki nongshong shnong ka jylla ban ai ka jingkyrshan kaba pura ia ka jingdonkam ban pynkylla noh iaki kyndon jongka Meghalaya Succession to Self Acquired Property (Khasi and Jaintia Special Provision) Act, 1986 ban pynthikna ba kan don ka jingai bhah noh kumjuh iaka jingdon jingem ne ia ka spah ka phew sha ki Khun ki Kti.
“Ngi kyntu iaki paid Hynniewtrep ba kin ai iaki jingpynsngew bad jingai jingmut, ka jingiatreilang bad jingkyrshan ha kaban wanrah noh iaka ain ka ban kyntiew bad ka atiar sha baroh ki khun ki kti jongki longing longsem bad ia ki pateng ban dang wan bad da ka sap bad ka jingdon jingem kaba ka jylla ka don, toh ngin pynlong iaka Meghalaya kaba khlain haka ioh ka kot bad ka burom ia ka ri India” ong u Convener jongka Maitshaphrang u Bah Michael Syiem haka kyrwoh khubor.
Pule lang ia kane: Dawa ka AIM ban khang ia ki jingpynialeh khalai ha ki mela ha Nongbah Shillong
Ia katei ka mat la iakren bad iatai ha ka jingialang kaba la pynlong da kitei ki 4 seng bad ki nongmihkhmat na ki Kur ha ka 15 tarik u Iaiong.
U Bah Syiem ula pynpaw ba ka pyrthei baroh kawei kala nang kiew shaphrang ha ka ioh ka kot bad katba ka ioh ka kot ka dang khlain ka ri ruh ka dang khlain, da kaba ai nuksa iaka ri USA, Germany, China bad kiwei kiwei.
Wat ka ri Israel ka bym heh than iaka jylla Meghalaya ha kaba 65% na ki jaka ki jongka kadei ka ri shyiap, ka khlain pat ha ka ioh ka kot watla kala don ru hka jingpyrshang jong ki ri kiba marjan ban pyntroin hynrei ka ri Isreal kala lah ban thomiaki jingtynjuh.
U Bah Syiem ula ong, lada ka Meghalaya ka kwah ban long ka jylla kaba khlain bad kaba kiew shaphrang bad kaba lah ban iada iala u pud u sam nalor ka jingshimkhia ban kyntiew ia ki kam pynroi, ka donkam ban kyntiew ia ka ioh ka kot bad ka long kaba kongsan ba ki trai ri trai muluk kin don bynta lang bad ban noh synniang ha kaban pynkhlain ia ka ioh ka kot.
Ha kane ka juk kaba mynta, ka long kaba eh bha ban ioh ia ka kam sorkar, kumta donkam ban pynkup bor ia ki khynnah ha ka liang ka ioh ka kot ha ki iing ki sem jong ki trai ri trai muluk khnang ba kan long ka jingplie lad ia ki ban shim ia ka ram ban seng kam lajong.
Pule lang ia kane: Pynkut noh ia ka MoU halor ka kam tih mar umphniang ha ki jaka khappud bad ka Assam : NNPGs
Ula ong, ka long kaba donkam ban pynkylla iaka Aiñ jong u snem 1986 da kaba kynthup ia ka kyntien ‘Equitable’ bad ‘Ancestral’ ha katei ka Aiñ bad ban tip noh kum ka Meghalaya Equitable Succession to Ancestral and Self Acquired Property (Khasi and Jaintia Special Provision) Act.
“Ka kyntien ‘Equitable’ ne jingbhah kumjuh ka ai iaka bor ha ki kmie ki kpa ban ai pateng iaka spah ka phew sha ki khun jongki, la kidei ki khun kynthei ne shynrang, iano bad katno kan shong ha ka jingstad ka jongki. Ki kmie ki kpa da ka jingstad ka jongki ki sngew ba ka khun khtaduh ka don hok ban ioh kham bun ia ka bha, katei ka aiñ kan shah ia ki ban leh kumtei lyngba ka ‘Will’. Ha ka longing ka bym don khun kynthei, hynrei kaba don tang ki khun shynrang, lyngba ka ‘Will’ ki khun shynrnag kin ioh ia ka hok ban shim pateng ia ka jingdon jingem ban tehlakam ia ki Kur ban knieh iaka jingdon jingem na ki, haba ki kmie ki kpa jongki kila khlad noh, ia kaba kum kine ki jingjia ki ju jia namar ka jingbym don ka aiñ” la pynpaw u Bah Syiem.
Ula pynpaw ba haka Aiñ jong u Snem 1986 la kdew ba iaka Self Acquired Property na ki kmie ki kpa lah ban ai daka ‘Will’ sha ki khun kynthei ne shynrang hynrei katei kadei ka spah jong ki kmie ki kpa ne ka Self Acquired property jong ki kmie ki kpa, tangba na ka bynta ki pateng ban dang wan kan kylla noh kum ka Ancestral property bad katei kan leit beit sha ka khun khatduh katkum ka jinghiar pateng ka spah ka phew. Kumta, ngi la dawa ba tang ha kaba iadei bad ka Ancestral property kaba hiar pateng na ki kmie ne meiieid dei ban shah ban ai da ka ‘Will’ ia kino kino ki khun bad ki pateng ban dang wan hynrei ym iaka Ancestral Property kaba dei jong ka Kur”.
U Bah Micheal Syiem ula ong ba la palat 30 snem kila iakhih halor kane bad mynta u dap da ka jingkmen ba bun ki longing longsem kila sam ryntih ia ka bhah sha ki khun kynthei bad shynrang, hynrei ka long kaba donkam pat ban don iaka Aiñ kaban pynkhlain bad pynskhem ia katei ka jingsam lyngba ka Will ne ka Gift.
Pule lang ia kane: Yn ioh 4G network ki 336 tylli ki shnong thain khappud ka Arunachal Pradesh
