Nongstoiñ, Naitung 6: Haduh lai phew tylli ki Shnong kiba don ha khappud ka West Khasi Hills bad Assam, kila pan ia ka jingkyrshan na ka Sorkar Jylla ba kan tuklar lem halor ka jingthmu jong ka Sorkar Assam ban den jubor ia ka Wah Khri na ka bynta ban pyntrei ia ka Kulsi Hydel Project.
Kine ki 30 tylli ki Shnong ki dei ki ban shah ktah jur eh ha kane ka jingden jong ka Assam ia ka Wah Khri ka ban pynngam ruh sahpoh um ia ki lai tylli ki Wahbah kiba don ha ka thain, kiba kynthup ia ka Wah Rambrai, Wah Dron bad ka Wah Kri.
Ka Shlem ha ka hiar jurip sha ka thain, kala shem ruh ba kane ka Hydel Project, kan sa ktah jur ruh ia ka jingthmu ban pyn trei ia ka surok bah ba pyniasoh ia ka sor Nongstoin ter ter sha Rambrai, sha Kyrshai haduh Chaigoan, Assam, kaba la pyntrei da ka National Highways and Infrastructure Development Corporation Limited (NHIDCL).
Ki Nongshongshnong ka thain kiba kynthup naduh ki Khasi, ki Garo ba wat ki nong Assam kila ieng tylli mlon ban pyrshah jur ia kane ka jingthmu jong ka Sorkar Assam.
Wat ki kynhun Sengbhalang na Assam ba kynthup ia ka All Rabha Student Union (ARSU), All Assam Student Union (AaSU) bad kiwei kiwei ki ïeng pyrshah ïa ka jingthmu den dam jong ka sorkar Assam.
Kine ki Sengbhalang ki dei kiba iadon bynta lang ruh ha ka Joint Action Committee (JAC) ka thaiñ kaba la lamkhmat da u bah Albert Nonglang sordar ka shnong Kyrshai kum u Chairman.
U bah Albert Nonglang Sordar ka shnong Kyrshai bad ka kong Binis Sohshang, kawei na ki longkmie kaba la paw bha ha ki kam ka imlang sahlang jong ka thaiñ bad u ma Phistar Syiem, Syiem Khynnah barim ka Hima Rambrai, ki la pynpaw ïa la ki nia ki jutang bad ong ruh hordit hordang kin ym ailad ban pyrurlong ïa katei ka jingthmu jong ka sorkar Assam.
Ki la ong ba lada ym don kiba kyrshan lem ïa kane ka jingpyrshah ïa katei ka project, khlem pep ka pateng ka ban wan kan sa shu sah satang ha ki khana bad ki khun ki kti kin sa long pynban tang ki phet wir.
Pule ruh: Hiar jngoh u Bah Paul Lyngdoh їa ka jingtreikam ka District Social Welfare ha WKH
