Shillong, K’lyngkot 20 : U Myntri ka Tnad Arts & Culture bad MLA ka BJP na South Shillong Bah Sanbor Shullai, ula kyrpad ia ka Sorkar Pdeng ban wanrah ia ki skhim halor ka kolshor bapher bapher ha Meghalaya khnang ban tyngkai bad iada ia ka kolshor ne jingleh tynrai ka Seng Khasi, Seng Raij bad ka Songsarek ki Garo.
U Myntri ula buh ia kane ka jingkyrpad hakhmat u Myntri ka Sorkar Pdeng ba khmih ia ka Tourism bad Culture Gajendra Singh Shekhawat ha ka jingiakynduh hapoh ka Iingsah jong u Myntri ha New Delhi, ha ka jingiadonlang u President ka BJP-Meghalaya bad kiwei kiwei ki nongialam.
“Ngi la buh ka jingkyrpad hakhmat u Myntri ba un wanrah ia ki skhim bapher bapher halor ki kolshor ka Meghalaya khnang ba ngin lah ban iada ia ka kolshor ka Seng Khasi, Seng Raij bad ka Songsareh ki Garo” ong u Bah Sanbor.
U Bah Sanbor ula tyrwa ruh ban buh ia ka Cultural Heritage Traditional Market ha Mawlai CRPF Camp ban pyni ia ka jingriewspah jong ka thain Shatei Lam Mihngi, haba kyrpad ia u Myntri ba un wan jurip ia kane ka jaka ban peitthuh ia ki jingdonkam, kaba lah ban pynkhlain bha ia ka kam jngohkai na ka kolshor.
Nalor kane, u Bah Sanbor ula kyrpad ia u Myntri kam jngohkai ba un pynlait ia ka Tourism Development scheme ha South Shillong Constituency, nalor ka ropeway project, ban lah aikam aijam ia ki nongshongshnong ka thain.
“Ngi la kyrpad ruh ia u Myntri kam jngohkai ba un pynlait ia ka Tourism Development scheme ha South Shillong Constituency, nalor ka ropeway project, ban lah aikam aijam ia ki nongshongshnong ka thain” ong u Bah Sanbor.
Ka jingialang kala pynleit jingmut ruh halor ka jingkyntiew ia ka kolshor ba hiar pateng jong ka Jylla bad ban pynbun ia ki jingtei jong ki kam jngohkai hapoh ka Jylla.
