Shillong, Jymmang 08 : Ki jaidbynriew Hmar bad ki Kuki kiba shong ba sah ha Meghalaya, kila pan ia ka jingiarap jong u Myntri Rangbah ka Jylla Conrad K Sangma bad ka Sorkar Jylla hynne ka sngi Nyngkong, ban lah pynthikna ia ka jingshong suk shongsain hapoh Meghalaya khamtam ha nongbah Shillong.
Ki Nongialam na kine ki Jaidbynriew kila pan ruh ia ka jingkyrshan na u Myntri Rangbah ha kaban iarap wan ialam lang noh ia ki ki jaidbynriew jong ki na Manipur ba kin iadonlang bad ki bahaiing hasem ha Meghalaya ha kum kane ka por ba shongsyier ha Manipur.
“Ngi la ong hooid ia ki, kat kaba ngi lah naka liang ka jong ngi, ngin leh beit ha kaban iarap ia ki. Kane ka dei ka por kaba jynjar ia ki bad kum ka Sorkar Jylla ngi sngewthuh ia ki jingpynsngew jong ki bad ngin sa leh kat kaba lah ban iarap ia ki bad kyrshan ruh ia ki” ong u Conrad.
U Conrad pyntip ba kine ki jaidbynriew kila kyrpad ruh ia ka Sorkar Jylla ba lada long kaba lah ba kan rah iakren lem ia ka jingeh jong ki bad ka Sorkar India. U Conrad ula pyntip ba ula kular ia ki bad wat kum u Nongialam ka seng sain pyrthei, un sa rah iakren ia kane ka kam bad ka Sorkar India.
U Myntri Rangbah ula pyntip ba shen un sa leit sha Delhi bad khlem pep un sa rah iaken bad ki Nongialam ha Delhi halor ka kam ba iadei bad ka jingsuk ha Manipur.
U Myntri Rangbah sa shisien ula kyrpad ia ki nong Manipur bad kiwei ki Jaidbynriew ba kin pynthikna ha kaban pynneh ia ka jingsuk bad ban sangeh noh ia ki kam iaumsnam.
Ula ong ba baroh ki jingeh bad jingiapher jingmut kiba mih, dei ban pynbeit noh lyngba ka jingiakren khnang ba kan mih ka lynti ha kaban lah pynbeit noh ia baroh kine ki jingiakynad.
U Myntri Rangbah u pyntip ba la jan kot 300 ngut ki briew la dep ban wan shaw na Manipur bad la pynpoi suk ia ki sha Meghalaya.
Ula pyntip ba ki dang don sa katto katne ngut kiba sah sah bad don ruh kiba la jied ban nym wan phai, u Conrad ula ong “Don sa katto katne ngut kiba sah ha ki jaka kyndong bad ngi dang iakren bad ki bad ngin sa peit kumno ba ngin lah wan ialam noh ia ki. Hynrei kiba bun hi kiba kwah phai, kila wanphai suk sha Jylla” ong u Conrad.
