Nongstoin, Jymmang 08 : Watla ka jingpynbeit ban iakren pynbeit pud jong ka wat ka ba-ar ka dang iaid shaid shaid, hynrei la kynnoh ba ka Sorkar Assam kala nang iai kyntur ia u pud ha ki shnong khappud ka West Khasi Hills bad dang ha kine ki khyndiat sngi, kala hiar sieh mawpud (pillar) ha ki artylli ki Shnong ban kam longtrai ia kine ki Shnong.
Kane ka jingsieh mawpud jong ka Sorkar Assam kala jia ha ka Shnong Noapara bad ha Dronpara. La kynnoh ba ka Sorkar Assam kala shu sieh jubor ia kine ki mawpud khlem ka jingtip jong ki bor Shnong.
Haba ioh jingtip ia kane, ka seng Federation of Khasi Jaintia & Garo People (FKJGP) bad ka Khasi Students Union (KSU) ka West Khasi Hills, hynne ka sngi Nyngkong ka 8 tarik Jymmang, kila hiar leit jurip ia kine ki mawpud ha Noapara bad Dronpara bad iakynduh ruh ia ki bor Shnong ban ai mynsiem ba kin ym duh jingkyrmen na kane ka jingwan pynibor ka Assam.
Ki Nongialam jong kine ki Seng kila iakynduh ruh ia ki Rangbah Shnong ka Naopara, Komphaduli, Dronpara bad ki shnong ba marjan ban iaphylliew jingmut bad ban wad bniah halor kane ka kam beain jong ka Sorkar Assam.
Na ka liang ki bor shnong kila pynpaw hakhmat kine ki Sengbhalang ba kane ka jingpynibor jong ka Sorkar Assam ka dei kaba ju jia manka por. Ki pyntip ba ki Pulit ka Sorkar Assam ki ju pynthut ruh man ka por ia ki nongshongshnong khamtam ki nongrep haduh ba kin knieh wat ia ki mohkhiew, ki wait bad kiwei kiwei nalor ka jingdawa pisa jubor.
Kine ki arseng kila ai mynsiem ia ki nongshongshnong ka thain ba kin ieng iatylli kawei bad ban ialeh pyrshah ia kane ka jingleh beain ka sorkar Assam haba kular ruh ba ki arseng kin iai don ryngkat bad ki nongshongshnong ha kano kano ka jingeh ba ki iakynduh.
Ha kajuh ka por, kine ki artylli ki Seng kila dawa ia ka Sorkar Meghalaya Democratic Alliance (MDA)-2 ba kam dei shu sngai ia kane ka jingkyntur pud ka Assam ha kine ki Shnong bad ka jinglehriewkhlaw na ka por sha ka por khlem da burom shuh ia ka soskular status quo.
Kine ki arseng kila maham ruh ia ka Sorkar Assam ba kam dei ban mushlia than ia u pud u sam ka Jylla haba kyntu ia ka Sorkar Meghalaya ba kan pynbeit mardor ia kane ka kam lem kumta ki arseng kin hap ban mih shakhmat ban iada iala u jong u pud u sam.
Kat kum ka jingtip ba dang shu ioh, ki paidbah nongshongshnong ka thain, kila leit kyndang bad phut noh ia une u mawpud ka Assam ba don ha ka shnong Noapara.
