Pan jingiarap ka Meghalaya na u PM Modi ban ioh ia ka pisa ba T.700 klur ka skhim JJM shuwa ka Khristmas

SHILLONG, DEC 3: Ka Sorkar Jylla ka la rai ban phah tuklar ha u Myntri Rangbahduh ka ri u Narendra Modi ban pyllait noh ia palat T.700 klur na ka bynta ban siew ia ki Bill kiba dang sahteng sha ki kontraktor kiba pyntrei ia ki projek jong ka Jal Jeevan Mission (JJM) ha Meghalaya hashwa jong ka jingrakhe ia ka Khristmas.

“Ka Meghalaya kadei ka jylla Khristan bad kadei ka kamram jong ka sorkar Meghalaya ba ngin shimkhia ia la ki jong ki briew. Da kaba pyrkhat ia katei, ngi lah pyrshang ban buddien bad ban pynkohnguh ia ka Sorkar India ban pyllait noh ia ka pisa sha baroh ki jylla Khristan kynthup ia ka Meghalaya” la ong u Myntri ka tnad PHE u Marcuise N Marak haba iakren bad ki nongthoh khubor hynne ka sngi Balang.

Ula pyntip ba u Myntri Rangbah ka jylla u Conrad K Sangma ula iakynduh ia u Myntri ka Sorkar Pdeng uba khmih ia ka Jal Shakti u CR Patil bad aiti ia ka dorkhas halor katei ka mat ha u snem ba la dep.

“Lada jia ba kam long eiei, nga la dep iakren bad u Myntri Rangbah ba ngi dei ruh ban iakynduh ia u Myntri Rangbahduh ka ri ban phah tuklar” la ong u Marak.

Katkum ka jingong u Myntri, ka jingslem ban pyllait ia ka pisa jong ka JJM kadei kaba la jia ha ka ri baroh kawei bad kala ktah bha ia baroh ki jylla.

“Ki Bill jong ka skhim (kaba kot T.700 klur) kadei ka bym pat siew sha baroh ki kontraktor namar ba ngim pat ioh ia ka pisa na ka Sorkar India” ula ong bad ka bynrap “Namar ka jingshateng jong ki Bill, ngim lah ruh ban ong ia ki kontraktor ba kin trei shaid shaid ia ka kam. Kumta ka kam ka lah sahkut”.

Ula pyntip ba palat ia ka 83% ia ka jingpyntreikam ia ka skhim JJM la dep ban trei pyndep hapoh ka jylla, u Marak ula ong, ba ka Sorkar Pdeng kala pynjlan ia ka por ban pyndep ia kane ka skhim haduh u snem 2028.

 “Ka sorkar India kala bthah ïa baroh ki Jylla halor ka jingdonkam ban pynduna ïa ka jingpynlut kaba la palat liam ïa kaba la mang ha jan baroh ki projek” ula ong, bad ka pynbna ba ka tnad kala pyniaid shkhmat ia ki kam ban pyndep ia ki jingleh ia ka geo-tagging ia baroh ki projek.