Yn ioh khajna ei ka Sorkar bad iohkam iohjam ki Nongbylla
Shillong, Nailur 29: Uwei u Nongkhaii dewiong na Ri-lum Garo, uba la jop ia ka jingiathong ban lilam ia u dewiong ba bha tam na Jharkhand, ula pan jingbit na ka Sorkar Meghalaya ban pyniaid lynti ia u dewiong na khappud ka Ri-lum Garo sha Bangladesh, kaba lah ruh ban ai khajna ei iaka Jylla bad aikam aijam ia ki nongbylla sngi.
Une u Nongkhaii dewiong u dei u Georgeman Marak, uba dei u nongkhaii ba nyngkong eh ha Jylla ban jop ia ka jingiathong lilam dewiong ba kot kumba 50,000 metric ton na Jharkhand, kaba la ai jingbit da ka Coal India Limited ban khaii sha Bangladesh.
U dewiong ba 3300 metrik toc bala ioh ban lilam, ula wan poi ha Goalpara lyngba ka lynti rel bad ia une u mar yn khaii sha Bangladesh lyngba ka Golaganj, kaba don ha Assam.
U Georgeman Marak ula shim bynta ruh ha ka jingiathong jong ka kylla ba-ar ban ioh lilam ia u dewiong na Assam bala pynlong da ka Coal India Limited.
Ka jingdawa ia u dewiong kala jur bha ha Bangladesh naduh ba ka National Green Tribunal (NGT) kala khang ia ka jingtih dewiong thliew khnai, kaba ktah bad pynkut ia baroh ki kam tih dewiong ha Jylla bad kaba la pynjulor ruh ia ka mei maraing nalor ka jingshim ia kiba bun ki mynsiem briew ha ki jingjia khyllem ki par.
“Nga la applai na ka Sorkar Meghalaya ban ai jingbit ha kaban khaii ia ki dewiong ba da ki hajar metric ton lyngba ka Jylla sha Bangladesh. Lada shah, kan ai jingmyntoi bha ia ka Jylla namar ka Sorkar kan ioh ia ka State GST, ka Transport revenue bad ruh kan aikam aijam ia kiba bun ki nongbylla kiba hap ban thep bad pynhiar ia u dewiong” ong u Georgeman.
U Georgeman ula pynpaw ia ka jingkyrmen ba ka Sorkar Meghalaya kan ai ia ka jingbit ban pyniaid lynti ia u dewiong naka Jylla khnang ba ka Jylla kan ioh ia shibun ki jingmyntoi.
Ka Ri-lum Garo ka jngai kumba 150 Km na Jogigopa, Assam kaba dei ka jaka sdang ban kit ia u dewiong. Ka dei kaba dang kham jan ban ia ka Bhutan kaba la pyniaid ia ka jingkhaii maw sha Bangladesh.
“Shuwa ka jingkhang tih dewiong thliew khnai ka NGT , ka Meghalaya ka ju khaii ym duna ia ka 75 lak metric ton u dewiong sha Bangladesh bad na kane, tang ka Ri-lum Garo ka por haduh 15 lak metric ton” pynkynmaw u Georgeman haba kdew ia ka jingkongsan kane ka kam khaii ban wanrah khajna ia ka Jylla bad ka iohkam iohjam ia ki nongshongshnong.
