Shillong, Jymmang 29 : Ka Committee on Reservation Roster hynne ka sngi Nyngkong, kala rai ban kyrpad ia ka Sorkar Jylla ba kan pyniar ia ka kti treikam jong ka Committee palat ia ka Roster System da kaba shah ne ailad ba kan iakren lang noh halor ka Job Reservation Policy.
Hadien ba pyniaid ia ka jingialang ba nyngkong eh jong ka Committee, ka Chairperson bad Myntri ka kam Ain Kong Ampareen Lyngdoh kala ong “ Ngin sa leit kyrpad ia ka Sorkar Jylla ban kynthup lang ia ka jingiakren halor ka Job Reservation kham kloi kat kaba lah”.
Kane kala mih hadien ba ka Voice of the People Party (VPP), kaba don 4 ngut ki MLA, kala rai ban nym iadon bynta lang ha ka Committee tad haduh ba ka Sorkar ka mynjur ban iakren halor ka Job Reservation Policy.
Ka Kong Ampareen kala ong ba baroh ki Seng sain pyrthei kynthup ka Garo National Council (GNC), kila wan ban iashim bynta ha ka jingialang lait noh ka VPP.
Kane ka dei ka rai lang halor ka jingtyrwa ban iakren halor ka Roster bad ka Committee kala rai ban buh hakhmat ia ki katto katne ki jingai jingmut sha ka Sorkar Meghalaya ba kan ai jingmynjur. Hynrei, ka VPP kan dang ban iadon bynta ha ka jingiakren.
Kat kum ka jingong jong ka Myntri, lada dei ban ai jingmynjur ia ka Roster System, baroh ki seng sain pyrthei ki dei ban ia don bynta lang ha ki jingiatai halor kane ka kam.
“Namar kata, ngin sa kyrpad ia ka Sorkar Meghalaya ban kynthup lang ia ka jingiakren halor ka Job Reservation Policy kham kloi katba lah khnang ba ngin ailad lang ia ka VPP ba kan wanrah ia ki mat jong ka sha ka Committee” ong ka Kong Ampareen haba bynrap “Haba ong ia kane, ha kajuh ka pir ngin sap hah ia ki jingai jingmut sah ka Sorkar Jylla ban shah ia baroh ki seng sain pyrthei ruh ba kin leh lang ia kajuh ka kam namar kam iahap ba tang kawei ka seng sain pyrthei kan ioh ia ka lad”.
Kala pyntip ruh ba shisien bala ailad lang ia ka VPP ban pynsngeew iala ki jong ki mat, ka Committee kan sa shim ia ka rai hadien ba kumno kan pyniaid shakhmat ia baroh ki kam kiba la wanrah ha ka jingiakren.
Ka Myntri kala bynrap ba ka Committee kan sa iakynduh biang ha ka 31 tarik u Jymmang, ban ailad ia baroh ki seng sain pyrthei ba kin wanrah ia ki jingai jingmut khnang b aka Committee kan lah ban pyntyllun shakhmat ia kane kawei ka kam.
Haba kyntu ia ka VPP ban wan iashimbynta ha ka jingialang ban wan jong ka Committee, ka Kong Ampareen kala ong “Ngin sa phah ia ka jingkhot sngewbha sa shisien sha ka VPP ba kan wan sha ka jingialang, kaba shong ruh ha ka jingai jingbit jong ka Sorkar ba ngin iakren lang ia ka Job Reservation Policy”.
Ka Myntri kala kular ruh ba ia ki minuted jong ka jingialang ba hynne ka sngi, yn sap hah mar mar sha u Myntri Rangbah ka Jylla ba un ai jigmynjur.
