Shillong, Jymmang 26: Ka Meghalaya Board of School Education (MBOSE) kala pynbna ia ka result jong ka eksamin Secondary School Leaving Certificate (SSLC) Supplementary bad haduh 80.35% kila pass.
Kane ka eksam ka dei kaba la pynlong naduh 1 tarik haduh 8 tarik Jymmang. Ki samla kiba shah bat sobjek ha ka eksam SSLC kila ioh iakhun ia kane ka eksam Supplementary.
Haduh 7066 ngut ki samla kila iakhun ia kane ka eksam supplementary bad napdeng kine, 5678 ngut kila pass.
Lah ban kdew ba iaka eksamin Supplementary Examination la pynlong khatduh eh ha u snem 1993.
Ka eksamin ka long kaba iaid beit iaid ryntih haka jingiatreilang hapdeng ka tnat pule puthi, ki bor district, Police bad ki bor pynïaid iaki jaka pule.
Ka jing Pass ki khynnah haka eksamin SSLC Examination 2025 naduh ka Main bad ka Supplementary kala kiew bha lada nujor bad ki snem bala dep bad kane kala urlong namar ka jingpyntreikam ka Sorkar iaka CM IMPACT Guide Book.
