Guwahati, Nailur 26 :Kila don haduh kumba 5202 ngut ki lehnoh kila shah kem ha ka jylla ka thain shatei lammihngi (Northeast) jong ka ri ha Assam naduh ka snem 2011.
Hynrei napdeng ki palat 5000 ngut ki lehnoh kiba la shah kem ha Assam, tang uwei uba la ngat ha ka jingshah rai pynrem kat haduh mynta.Nalor kata tang kumba mar shiteng na kitei kiba la shah kem noh kiba la shah pynngat kyndon haduh mynta, ong ka kaiphot.
Kine ki lehnoh kiba la shah kem ki dei na ka kynhun seng ULFA-I bad kiwei pat ki kynhun seng lehnoh kiba kynthup ia ki briew kiba dei Bodo, Garo, Rabha, Karbi, Adivasi bad na ki nongshong shnong kiba dei ki Muslim.
Napdeng kitei ki lehnoh kiba la shah kem na Assam naduh ka snem 2011, 2392 ngut ki dei na ki kynhun seng lehnoh Bodo, 1468 ngut na ka ULFA-I bad 582 na ki kynhun seng lehnoh jong ki Karbi.
Nalor kata, kumba 346 ngut ki dei ki kynhun seng lehnoh na ki jaidbynriew Adivasi, 178 na ki jaidbynriew Garo, 155 na ki Muslim bad 81 ngut na ki nongshong shnong kiba dei ki Rabha ia kiba la kem noh da ki bor pulit ka Assam.
Na ka liang ki riew shemphang kila iohi ba ka jingpynlong ia ki jingtohkit bad ka rukom treikam jong ki kashari ki long ka daw halor ka jingduna ha kaba iadei bad ka jingdon jong kiba shah rai pynrem.
Katkum ki khubor la ong ruh ba kiba dei ki case ki dang iai sah hapdeng ka jingtian bishar bad tang uwei u briew uba dang shah rai pynrem.
“Tad lada ngi tip ia ki tarik jong ka jingshah kem bad ka jingujor ba la phah sha ki kashari, ka long kaba shem shitom ban tip nangno kane ka jingpynslem ka jia.Ki don ki khep ba ki nongtohkit kila pynslem ia ka jingtohkit namar kiba bun ki lehnoh ki ioh ia ka jingkyrshan da ki riewsain hima, bad kane kala kylla kam sain hima,” ong u advocate ka iingbishar Gauhati high court u Santanu Borthakur lyngba ka lad pathai khubor.
