Shillong, Rymphang 28 : Palat 5.2 tylli ki Longiing ha ki shnong Nongkyndong kila ioh ia ka kor um iing ba poi um lyngba ka Jal Jeevan Misson (JJM).
“Tang ha kine ki khyndiat snem, ka Meghalaya kala kiew bha. Na ka 0.72% ka jingpoi kor umiing ha u 2019, ka Sorkar Jylla kala lah ban pynpoi kor um iing haduh 81% ki longiing tad haduh u Kyllalyngkot 2025, kaba long palat ia ka National average” ong u Lat ka Jylla CH Vijayashankar haba ai jingkren ha ka Dorbar Mang tyngka hynne ka sngi Thohdieng.
“Nalor kata, haduh 4,024 tylli ki Shnong kila ioh kor um iing ba kot 100% kaba pynlong ia ki kum ki shnong bala tip kum ka “Har Ghar Jal” ula ong.
Ha ki jaka ba ki tyllong um kila tyrkhong na ka jingkylla ka suinbneng, u Lat ula ong “Ka Sorkar kala shim ia ki sienjam ban pynim biang ia kine ki tyllong um bad ban shna ia ki pung pyllang um.
Kat kum ka jingong jong u, u paia ba kongsan eh jong ka JJM ka long ban pynthikna ba ki nongshongshnong ki ioh ia ka umbam umdih kaba khuid bad ba shngain.
U pyntip ruh ba ka Sorkar kala buh mynta ia ki water quality testing laboratory bala ithuh da ka NABL ha man la ki district bad sub division ban pynthikna ia ka jingsam umbam umdih kaba khuid.
Nalor kata, ka Sorkar kala pyntrei ruh ia bun tylli ki water supply scheme kiba heh ba kynthup ha Shillong, New Shillong, Williamnagar, Nongstoin, Ampati bad Tura.
.){kind=link}