Aizawl, Risaw 27: Kumba la rai da ka committee jong ki nongialam shnong ha kaba iadei bad ki phetwir napoh Myanmar, na ka liang ki volunteer na ka shnong Farkawn kaba hapoh Champhai district kila pynlong ka jingap pahara ha kito ki jaka kiba hajan khappud bad ka Myanmar khnang ban khanglad ia ki kam khaii drok lyngba jong ka wah Tiau kaba don ha khappud.
Katto katne ki phetwir na Myanmar kiba la wan shong riehtngen hapoh Mizoram khatam ha ki jaka thain khappud, ki don ia ka jingmlien ban rung shapoh Myanmar bad ban wanphai pat sha ki shnong ki thaw halor ki katto katne ki daw, ong u dkhot jong ka committee.
Ula ong ba u suba jur ba kum kine ki briew ki dei kiba lah ban donkti ha ki kam khaii drok lane kiwei pat ki kam khaii beain napoh Myanmar sha Mizoram.
Watla ym pat shym la don iwei ruh ki ban shah kem ha kaba iadei bad ki kam khaii drok ne kiwei pat ki kam khaii beian haduh mynta, hynrei ka jingpahara ia ki jaka khappud khamtam ha ki jaka rung kan khanglad ia ka jingthmu leh kam beain, ula ong.
Ia mynta hi kila don haduh kumba 886 ngut ki phetwir hapoh ka shnong Farkawn bad na ka liang ki kynhun bhalang kila shim ia ki sienjam ban pynthikna halor ki kam shong shngain jong ki shnong ki thaw kumjuh na ka bynta kine ki phetwir, ula ong shuh shuh.Ula ong shuh shuh ba kila khang pyrshah ia kine ki phetwir ba kin leh ia ki kam khaii pateng lane ban plie dukan hapoh ka shnong.
Na ka liang ki nongialam kila ong ba watla kam shym la don shuh ka jingwan poi kynhun jong ki phetwir mynta lah kumba saw bnai napoh Myanmar, hynrei kila don khyndiat eh ki phetwir kiba dang pyrshang ban wan rung.
Watla kam shym la don ka jingwan tuid paidbah jong ki phetwir naduh kine ki saw bnai ba la dep, hynrei kila don haduh kumba 30,374 ngut ki briew kiba la phet krad na Myanmar naduh kine ki ar snem ba la dep kiba dang iai sah hapoh Mizoram, kata kat haduh ka 15 tarik mynta u bnai.
Napdeng kine ki 30,374 ngut ki phetwir ia kumba 13,210 ngut la pynshong ha ki 160 tylli ki ktem sah shipor, katba kumba 17,146 ngut ki la shong la sah bad la ki jong kiba haiing hasem ki paralok para jor lane kiba shu wai iing.Ka thain shatei mihngi jong ka Champhai district ka dei kaba don bun eh kine ki phetwir, kata haduh kumba 9,488 ngut bud sa ka Siaha da 7,247 ngut.
