Nongpoh, Nailar 11 : Ka Ophis u Sub Divisional Officer ka Patharkhmah Civil Sub Division, kala ot ribon ia ka jingrakhe Independence Day ka Ri India, hynne ka sngi thohdieng da kaba pynlong ia ka jingiakop mareh matahon hapoh ka thain.
Kane ka jingiakop mareh ka dei kaba 7 Kilometer bad la pynsdang ia ka na Jirang Hr Secondary School bad la pynkut pat ha Patharkhmah Govt Higher Secondary School.
Ia kane ka jingiakop la kaweh lama da u Bah Sosthenes Sohtun, MLA ka Jirang constituency ha ka jingiadonlang u SDO (Civil) ka Patharkhmah Bah MB Tongper, u District Sport Officer Bah Bobby L Nongbet lem bad kiwei kiwei ki Ophisar.
Haba kren ha kane ka sngi, u Bah Sosthenes Sohtun, u la ai khublei kyrpang ia ka ophis u SDO ka Patharkhmah lem bad ka tnad Sport kiba la shimkhia ban pynlong ia kum kane ka prokram ban shimbynta ha ka jingrakhe ia ka sngi laitluid ka ri India, da kaba u la bynrap ruh, ba kane ka jingmareh ka dei ruh ka jingmareh ban laitluid na kiei kiei kiba sniew ha ka jingim jong u ne ka briew bad ban ioh ia kilan met na ka bynta ka koit ka khiah.
U la ong ruh, ba kum kine ki jingiakop kin ai ruh ia ka rynsan kaba paka na ka bynta kito ki samla kiba don ia ka sap ialehkai ha ka kam mareh sport bad ruh ba kin nang lah ban pyntbit ialade ba kin kiew ha kane ka kam ialehkai, da kaba u la ai ruh ia ka jingkitbok ia baroh ki nongiashimbynta bad ruh ka jingkhublei sngi laitluid ka ri India.
Ha kane ka jingiakop mareh marathon kaba 7 kilometer, u Bah MB Tongper kum uwei na ki ophisar u ba bat ruh ïa ka kyrdan Addl. Deputy Commissioner ka Ri Bhoi u la ïa shim bynta lang ha kane ka jingiakop ban ai mynsiem ia ki nongiashimbynta.
Haba phai pat sha Kane ka jingïakop jong ki shynrang u samla Kobarlin Doloi u lawan nyngkong, u Samla Vincent Diya u la wan ba-ar bad u Samla Rigenson Diengdoh la wan balai, ha ka liang ki kynthei pat ka samla Rikynti Ranee ka la wan Nyngkong, ka samla Banisha Ranee ka la wan ba-ar bad ka samla Moniga Mego ha ka kyrdan kaba lai.
Pule lang ia kane: Assam : Kem ki Pulit ia ka kynhun ki runar ba bujli ia ki ATM card ban tuh pisa
Peit lang ia kane
