Kynthoh ia ki seng sain pyrthei “Ngim ju byntiew ha ka pliang ba ngi ia bam ja”
Shillong, Jymmang 01 : U National President ka National People’s Party (NPP) bad Myntri Rangbah ka Jylla Conrad K. Sangma hynne ka sngi nyngkong ula ther tyngeh ia ki seng sain pyrthei halor ka jinglong arsap bad shim kabu politics watla ki dei kiba iadonlang ha ka Sorkar MDA.
“Watla ki dei shibynta jong ka Sorkar MDA, kine ki party kila kynthoh bad kren pyrshah ia ka NPP haba wan kano kano ka elekshon. Kane ka jingleh jong ki ka pynmong ym tang ia nga hynrei kam dei ruh kaba bha na ka bynta ki paidbah ka Jylla” ong u Conrad.
U Conrad ula kren ia kane na ka rynsan ialap elekshon ia u kyrtong ka NPP bah Samlim Malngiang ha Sohiong hynne ka sngi na ka bynta ka elekshon MLA ka ban long ha ka 10 tarik Jymmang.
Urge the people to join us in ensuring victory for the NPP so that together, we can ensure Sohiong becomes a model constituency in our State. pic.twitter.com/bexAG3PeuK
— Conrad K Sangma (@SangmaConrad) May 1, 2023
“Kin don bun ki seng sain pyrthei, ki ban sa wan shane bad kin ai ki jingkren ba bun jait pyrshah ia ka NPP. Hynrei kin sa iatreilang pat bad ka NPP ynda kala dei ka por ia ki hynrei ha ka por ialap elekshon pat, kin kynthah laitphew jait ia ka NPP” ula ong.
“Nga kwah ban ong ia ki (kiwei ki seng) ba ha ka dustur jong ngi, ha ka dustur ha Ri India, ha ka dustur u Khasi bad ki Garo ruh kumjuh, ngim ju byntiew ha ka pliang kaba ngi ia bam ja. Sngewbha kynmaw ba ngim ju leh kumta” ula kynthoh.
U Conrad ula ong ba u Nongialam u dei ban mihkhmat ia ki paidbah bad ban iakhun na ka bynta ka jong ki hynrei ha kajuh ka por u dei ruh ban burom ia kiwei. ““Ngi dei kiba bha bad kiba sngewrit bad ngi iatreilang namar ngi ngeit ha ka jingiatreilang. Ngam pat ju pynmih kawei ruh ka kyntien pyrshah ia kine ki briew, hynrei ka pynmong ia nga mynta ka sngi haa nga iohsngew ia ki kyntien bad ka politics pynpait pynpra ba ki ialehkai kine ki briew. Kane kam long kaba bha ia ki briew jong ngi bad ka Jylla” ula ong.
Lah ban kdew hangne ba ia ka elekshon MLA ha Sohiong la pynkynriah tang da ki sngi shuwa ka elekshon MLA ba long ha ka 27 tarik Lber ha baroh kawei ka Jylla namar ka jingkhlad kyndit jong u kyrtong ka UDP bad Myntri kam pohiing barim ka Jylla Bah HDR Lyngdoh.
Ha kajuh ka por, haba kyrpad ia ki paidbah ba kin vote ia u kyrtong ka NPP ban wanrah ia ka roi ka par bad ka jingkylla ia ka Sohiong constituency, u Conrad ula ban jur ba lynti hi ban wanrah ia ka roi ka par ia ka constituency ka dei ka jinvote ia ka party kaba ialam ia ka Sorkar,kaba dei ka NPP. Ula kyntu ia ki paidba ba kin ym pynsngew ia kiwei pat ki seng sain pyrthei bad ban pynthikna ba ka Sohiong constituency kan kylla long ka model constituency.
“Phi la iatip baka dei ka NPP kaba ialam ia kane ka Sorkar bad namar kata ka jingthep vote sha kiwei pat ki kyrtong kiba dei na kiwei ki seng sain pyrthei, kan dei ka jingduhnong ia phi bad ia ki paidbah ka Sohiong constituency” ula ong haba bynrap “Namar ka lynti kaba lah ban pyntyllun shakhmat ia ka Sohiong, kawei ka lynti kaba ngin lah wanrah kam pynroi ia ka Sohiong, ka dei tang ka jingiadonlang bad ka Sorkar bad ka jingai vote ia ka party ba ialam ia ka Sorkar”.
U Conrad ula ong “Namar kata, khnang ban wanrah ia ka jingkylla bad ka roi ka par, nga kyntu ia phi baroh ban nym sngap ia kiwei ki seng sain pyrthei kiba wan ban ai jingkren khnang ba ngin pynthikna ban pynkylla ia kane ka constituency sha ka model constituency”.
U Myntri Rangbah ula kren ruh halor ka surok Western Bypass kaba shongdor haduh T. 800 klur bad ong ba ia kane ka project la wa rah da ka NPP bad kan sa pynkylla ia ka jingim jong ki nongshongshnong ka thain.
“Jan 80% na ka surok Western Bypass kan iaid na kane ka constituency. Phi lah ban mutdur katno ki jingim kin kylla, katno kan aikam aijam, katno kan kyntiew ia ki kam jngohkai, ki nongrep kin ioh jingmyntoi. Kane ka dei ka politics ka roi ka par jong ka NPP” ula ong.
Ula kular ia ki paidbah ban pyntyllun shakhmat ia ki jingdawa ba iadei bad ka jingpynjanai bad kyntiew kyrdan ia ki jaka pule bad ki jaka ai jingsumar hapoh ka constituency.
