Ho Chi Minh, Risaw 29: Ka 3rd North East India Festival, kala sdang ha ka sngi Thohdieng ha Ho Chi Minh City, Vietnam.
Kumba 52 tylli ki Tour Operator na Vietnam bad 20 tylli na ka thain shatei lammihngi kila ia shong jingialang ha kaba iadei bad ka kam jngohkai ha ka North East India Festival kaba la long Ho Chi Minh City.
Ha ka sngi ka baar, jong katei ka prokram la sakhi ba ki riewpawkhmat na ka ri India bad Vietnam, kiba kynthup ia ki Myntri Rangbah ka jylla, ki Myntri ka sorkar pdeng, ki riewshimet kiba pawnam ha ka khaïi pateng, kila iashimbynta haka jingiaphylliew jingmut ha kaba iadei bad ka pule puthi, khaïi pateng bad ka jingpynsngewthuh ha kaba iadei bad ka kolshor.
U Anil Oraw, Regional Director jongka Ministry of Tourism, ka sorkar India, haba kren ha ka jingialang ula banjur ia ka jingdonkam ban kyntiew mar kylliang ha ka kam jngohkai bad ka khaïi pateng.
“Ngi thmu ban wanrah ia ki Vietnamese Tour Operators sha ki bynta jong ka ri India. Kane ka jingkyntiew mar kylliang kan pynriewspah ha kaban sngewthuh khambha iaka kolshor bad kumjuh iaka kam jngohkai bad iaka khaïi pateng” ong u Anil.
Katba u Sandeep Arya, uba long u nongkit tiensyiem ka ri India sha Vietnam ula banjur iaka jingdonkam ban pyniasoh kaba khambha, ka khaii pateng bad ka kam jngohkai hapdeng ka Vietnam bad ki jylla ka thain shatei lam mihngi bad ban kyrshan iaka jingher ki liengsuin na Guwahati bad Hanoi bad HMCC.
U Dinh Vinh Cuong, Director jongka Vietnam International Entrepreneurs Networking Club ula ong, “Ngi dang iaphylliew jingmut ban sdang noh iaka jingpynher ia ka liengsuin na Vietnam sha ki jylla ka thaiñ shatei lam mihngi. Nga la don iaka jingiakren kaba seisoh bad u Shyamkanu Mahanta bad nga sngewtynnad ban pyntip ba ngan sa ialam ia ka kynhun kaba kynthup ia ki 22 ngut ki nongbei tyngka ban wad ia ki lad ki lynti ban iatreilang bad ki jylla ka thain shatei lam mihngi ha ki bnaiban wan”.
U Shyamkanu Mahanta, Chief Organiser jongka North East India Festival, ula ong, “Ka jingioh jingtip haduh mynta ka long kaba biang bha. Ha ka sngi sdang la sakhi ia ka jingwan iashimbynta ki nongialam na ki Province ki bapher bapher jong ka
Vietnam ban iashimbynta ha ki jingiatai kiba seisoh. Ka jingiatai mynta ka sngi halor ka khaii pateng bad ka kam jngohkai bad ki kompani na Vietnam, kaba la btin lynti da ka DoNER Ministry India and Invest India, ka long kaei kaei kaba seisohbha. Nga dap da ka jingkmen ba ka thain shatei lam mihngi kala lam ia ka lynti ha kaban pyninam iaka Vietnam kum ka thong bad ban pynwandur iaka Act East policy jong u Myntri Rangbahduh ka ri u Narendra Modi. Ngi kyrmen skhem ba kane ka jingthmu yn tang ban wanrah ia ka jingiadei kaba don jingmut hapdeng ki ri hynrei ban pynmih ruh ia ki buit treikamha kaba iadei bad ka pule puthi, kolshor bad ka khaïi pateng. Ngi pynpaw ka jingsngewnguh kaba khraw ia baroh kiba donbynta na ka ri Vietnam bad ki nongmihkhmat naka ri India.”
Na ka liang u Madan Mohan Sethi, Consul General of India ha HCMC, ula ong, “Ka thain shatei lam mihngi ka long kum ka jingkieng jong ka kolshor bad ka ioh ka kot hapdeng ki ri. Ka long kaba sngewkmen ban sakhi ia ka mynsiem jong ka jingiatreilang bad ka jingpashat jingmut lyngba katei ka festival.”
