Nongstoiñ, Ïaiong 3: U MLA ka Rambrai-Jyrngam constituency Remington Gabil Momin ha ka sngi u Blei ula leit iakynduh ïa ki 25 ngut ki briew na ka shnong Malchapara kiba shah thwet ha ki Pulit ka Assam bad ula ai jingiarap ia kine ki lanot kiba dang rieh mynta hapoh ka Ophis treikam u Sirdar ka Nonglang Sirdarship.
Lah ban kdew hangne ba kine ki briew ka shnong Malchapara kila shah thwet ha ki Pulit Assam naduh ka 28 tarik Lber hadien ka huri hura ba mih na ka madan ialehkai ha ka Shnong. U Sirdar ula pynrieh ia kine ki briew hapoh ka Ophis treikam ba kin lait na ka jingthombor ki Pulit Assam.
U MLA uba ioh jingtip ia kane, hynnin ka sngi U Blei ula leit ban iakynduh ia kine ki lanot ha ka jingia donlang u Secretary ka Hima bad u Myntri ka Hima. U MLA ula ai ruh ia ka song jingiarap ba kynthup ia ki marbam naduh u khaw, shini, dai, phan, biscuit bad ka song pisa ba T. 10,000.
Kat kum ka khubor bala ioh, kine ki 25 ngut ki briew kila ioh ia ka bah jamin lupa ne anticipatory bail halor ka jingthwet ki Pulit ka Assam.
Kine ki briew ha ryngkat ka jingsynran ki Nongialam ka Hima kin sa leit mih lashai ka sngi sha Thanat Boko ban aiti ia kane ka bah jamin.
