Shillong, Nohprah 13 : Ka Chairperson ka All India Trinamool Congress (AITC) Mamata Banerjee hynne ka sngi ba-ar kala ong ba ka party kan sa pynbna ia ka kyrtong Myntri Rangbah hadien bala pynbna ka Election Commission ia ka elekshon ha Meghalaya.
Kala kynty ruh ia ki paidbah ba kin ia antad hi ba mano ban dei u kyrtong Myntri Rangbah jong ka AITC napdeng ki arngut ki Nongialam-Dr Mukul Sangma bad u Bah Charles Pyngrope.
“Ngin sa pyntip sha phi shen. Ai ba ka jingpynbna iaka elekshon ban mih shuwa. U Dr Mukul u dei u Myntri Rangbah barim bad ngi kmen shisha ia ka jingtreikam jong u. U Bah Charles ruh u don bad ngi kmen bha-ta ka daw phi lah ban iaantad mano ban dei” ong ka Mamata haba iakren bad ki nongthoh khubor.
Haba pynpaw ba ka mat treikam jong ka party yn sa pyntip ha ki khyndiat por ban wan, kala ong “Ngin sa leh lut ia baroh ki kam ba kongsan. Nga don shibun bah ki skhim ban iarap ia ki paidbah. Nga kmen ba ka Meghalaya ka don ia ki Nongialam kiba tbit”.
Haba kylli, ka Mamata kala ong ba ki nongialam ka Party kin ym tuklar ia ka rai jong ka State Party, kaba la dep rai ban pynmih kyrtong na baroh 60 tylli ki Constituency.
“Lada don kiwei ki party kiba kwah iasoh ne don ka jingiatreilang, ka rai kan shong ha ka party ha Jylla bad ngim don jingpyrshah satia ia ka” kala ong.
Ka Banerjee kala pyntip ruh ba ka AITC kala pynkhreh ban chargesheet ia ka Sorkar MDA ba ialam da ka NPP ha ka Jylla.
