Guwahati, Jymmang 10 : U Myntri Rangbah ka Assam Himanta Biswa Sarma hynne ka sngi Ba-ar, ula ong ba ka Sorkar kan nang iai pynjur ia ka jingkyndang ia ki kam pyniashongkha khynnah hapoh ka Jylla.
Haba iakren bad ki nongthoh khubor, u Himanta ula ong “Ka Sorkar Assam kan nang pynjur lai shah haba iadei bad ka jingkyndang ia ka kam pyniashongkha khynnah hapoh ka Jylla”.
“Kin don bun ki jingkem briew ha ki sngi ban dang wan. Kan don ka jingkhynra kaba jur pyrshah ia ki briew kiba pyniashongkha ne ba iashongkha khynnah” ula bynrap.
U Himanta ula ong ba ka Sorkar Jylla ka don jingthmu ban pynkut noh ia ka jingpyniashongkha khynnah hapoh u snem 2026.
“Hapoh u 2026, ka kam pyniashongkha khynnah kan kut noh ha Assam. Ngin shim ia ka sienjam kaba tyngeh ban pynthikna ia kane” ong u Himanta haba bynrap “Ka Sorkar kala don ia ka plan kaba bniah bha ban pynthikna ba kane ka kam kan kut noh hapoh ka por bala buh”.
Ka Sorkar Assam dang shen kala pynsdang ia ka jingkhynra pyrshah ia ki kam pyniashongkha khynnah ha ka Jylla bad haduh mynta, palat 4000 ngut ki briew kila shah kem.
