Itanagar, Jymmang 10 : Ka kamai ka kajih bad ka iaid ka ieng ki paidbah kala shah ktah jur ha Nongbah ka Arunachal Pradesh hadien ka jingkhot pakhang shnong ba 72 kynta da ki katto katne ki briew bad kynhun ban pyrshah ia ka jyrsieh lait tuh jingkylli jong ka State Public Service Commission.
Baroh ki dukan kynthup ki Bank bad ki jaka pule kila khang khyrdep lut. Ki kali ruh naduh ki kali kamai ka Sorkar bad ki kali shimet ki khlem mih surok shuh lait noh tang ki kali ki Pulit bad Magistrate kiba don ha ka kam.
Kane ka pakhang shnong kaba sdang ha ka por 5 baje mynstep, kala iaid beit iaid ryntih khlem kino kino ki jingjia.
“Haduh mynta, ngi la bat ia 17 ngut ki briew. Ka jingbat ka long kat kum ka Arunachal Pradesh Unlawful Activities (Prevention) Act 2014,” ong ki Heh Pulit.
Ha kajuh ka por, ka bor District kala pynjari da ka kyndon 144 CrPC khnang ban pynthikna ia ka jingshngain bad jingiada ia ki paidbah nalor ki nongkynti jong ki riew shimet bad jong ka Sorkar.
Ha ka sngi palei, ki paidbah kila kyndang bad pynpra ia ka khyrdop jong ka Naharlagun Police Station hadien ka jingshah kem ki katto katne ngut ki briew kiba la khot ia ka pakhang shnong.
Ka jinglait tuh ka jingkylli ka Arunachal Pradesh Public Service Commission (APPSC) kala wanrah ia ka jingkulmar kaba jur ha Jylla bad bun ki kynhun kila mih ban iakhih pyrshah ia ka.
Ka CBI kala shimti ia ka jingtohkit halor kane ka jinglait tuh ka jingkylli bad ka la kem ia palat 50 ngut ki briew kiba donkti.
Haduh mynta, 54 ngut ki briew kynthup ia 41 ngut ki Ophisar ka Sorkar kila shah kem haba iadei bad ka jinglait tuh ka jingkylli jong ka APPSC.
