Shillong, Nailur 28: U Symbud Myntri Rangbah ka jylla u Bah Prestone Tynsong hynne ka sngi Balang ula kren da kaba shai ba ka Sorkar Jylla kam don por ban pynlut bad u nongaiktien ka All India Trinamool Congress (AITC) u Sakhet Gokhale uba la kob ban iatai nia.
“Ngim don por ban pynlut bad une u briew (Sakhet Gokhale). Nga iohi mynta ula sdang ban kob sa ia u Myntri Rangbah ka Jylla. Nga tharai une u briew um don jingtip ia ka rukom treikam” ong u Bah Prestone.
Namar ka jingiai kynnoh ia ka jingbym beit ka synshar khadar jong ka Sorkar Meghalaya Democratic Alliance, u Bah Prestone ula ong “Mynta ngi don ia ka RTI, balei ba une u briew um pan ia ki jingtip lyngba ka RTI na kino kino ki tnad Sorkar lada u sngew ba ka don ka jingbym beit ha ka rukom treikam hynrei u pynlut por ha ka jingiakob iatai nia”.
Haba kynthoh ia ka jingkwah mushlia jong une u Nongialam ka AITC ia ki kam ka Jylla, u Bah Prestone ula ong “U (Gokhale) u kam ialade kum u Nongaiktien, nga tharai u Nongaiktien u dei ban long napoh ka Jylla Meghalaya. Ngam tip la ka AITC ka don ne em ia u Nongaiktien ha ka Jylla”.
“U Nongaiktien na Jylla ne wat ki MLA kim kren eiei, hynrei une u briew nangno ka pyrthei ula heh nia bad kob ia ka jingtreikam ka Sorkar” ula ong.
“Dang shen ngi dang shu pynkut ia ka Dorbar Synrai bad ki MLA ka AITC kila wanrah ia ki mat iatai bapher bapher ia kaba ka Sorkar kala dep ai jubab lut. Kumta nga ong biang, ngam don por ban iakren bad une u briew (Gokhale)” bynrap u Bah Prestone.
Haba kylli ia ka jingwan mushlia, u Symbud Myntri Rangbah ula ong “Dei ban kylli na ka TMC ka Meghalaya halor ka jingwan tuklar une u Nongaiktien lehse ka TMC ka don ia ka jingthmu ban pynlong ia u kum u kyrtong MP ne ka don da kawei pat ka jingthmu”.
U Bah Prestone ula ong ba ka TMC Meghalaya ka dei kaba don ia baroh ka hok ban kylli jingkylli halor ki jingtreikam jong ka Sorkar.
