Guwahati, Nohprah 30: U Myntri ka Sorkar Nagaland uba khmih ia ka kam jngohkai bad ka pule puthi, u Temjen Imna Along, ula pynrem jur ia ka jingshah thombor u samla pule na Tripura ha Dehradun bad ka pynpaw ba ka thain shatei lammihngi kadei shi bynta jong ka ri India.
Haba iakren bad ki nongthoh khubor, u Temjen Along ula kyntu ia ki paidbah ba kin long kiba husiar haba ki kren ne leh eiei. “Ha kaba nyngkong eh, ngi dei ban pyrkhat hashwa ba ngin kren eiei. Ngam lah ban pynrem jur ia ka imlang sahlang baroh kawei, hynrei tang ia kito kiba la donkti ha katei ka kam thombor ki bym don ia ka jingsngewthuh ia ka jinglong ki briew ka thain shatei lammihngi”.
“Ngi ngim ju khein ialade kum ki Chinese bad ngim dei hi ruh ki ‘momo’. u Momo udei u jingbam uba bang bad ki ruh kidei ban bam lang. Hynrei kane ka rukom leh ka jongki ia ngi ka long kaba bakla bha”.
U Myntri Sorkar ula ong “Ngi dap da ka jingsngewsarong ba ngi dei ki nong India. Ka thain shatei lamihngi kadei shi bynta jong ka ri India. Kum katei ka rukom leh kam long kaba bha ia ka imlang sahlang” bad ka bynrap ba ki briew kiba la donkti kila shah kem.
“Ngi kwah ban wan ialam ia ki shane bad pyni ia ka jingbha bad jingsngewtynnad ki briew na Arunachal, Nagaland ne na kiwei kiwei ki jylla. Kin sa sngewthuh ba ngim dei ki Chinese ne ‘ching pong ching’ ngi dei ki nong India. Hooid ngi wan na Nagaland, Manipur ne Tripura ka rukom long ka jong ngi ka lah ban long kaba pher hynrei ngi dei pat shi bynta jong ka ri India” ula ong.
Ha kawei pat ka liang ki pulit, ki pulit ka Uttarakhand kiba tohkit ia ka jingshah pyniap u Anjel Chakma kila pynpaw ba kam shim la don kano kani ka dak ka shin ba kadei na ka jingsngewpher jaidbynriew, watla ki nongialam sain pyrthei bad ki kynhun ki samla pule kila pynpaw ba katei ka jingjia kadei na ka jingiashun jaidbynriew.
Katkum ka khubor na ki pulit, kila kynnoh ba u Anjel ula shah thombor da ki tari bad ka Knuckle bad la pynkit noh ia u mardor sha hospital hynrei namar ka jingban jur jong ka jingmynsaw ula khlad noh ha ka 26 tarik u Nohprah.
U kpa jong une u samla, u Tarun Chakma uba don ha Manipur bad ka Border Security Force (BSF) ula kynnoh ba kala don ka jingkren bad jingkynthoh beiñ ia ka jaidbynriew hashwa ba kin thombor ia u.
