Agartala, Naitung 01:Ha ka jingjia ka ba lah ban wanrah ka jingkylla, u Myntri Rangbah (CM) barim ka Tripura u Manik Sarkar hynne ka sngi u la ong ba ka party jong u kam don kano kano ka jingpyrshah lada ki kynhun liang pyrshah ki kwah ban iatylli lang ha ka ban pynrem ia ka BJP ha ka ilekshon assembly ka ban long ha u 2023.
Ia kane u Sarkar u la jubab halor ka jingkylli ka ba iadei bad ka jingkhot u MLA ka Congress u Sudip Roy Barman ia ki party liang pyrshah ban pyrkhat jngai na ka bynta ka thong ban pynrem ia ka sorkar BJP ha ka jylla.
U Sarkar u la ong ba lada u lah ban pyniatylli ia ki party liang pyrshah kin ym don kano kano ka jingujor halor kane. “Ngi la leh ia ka ba bha tam bad ngi kwah shuh shuh ia ki briew ba kin ai ka jingiatreilang bad ngi ha kane ka jingialeh.”
Katkum u Sarkar, ki nongtrei jong ka Left ha baroh ka jylla ki dei ki lanot sain hima ki ba la kham shah ktah jur eh na ki kam iaumsnam ha ka por ba la pynlong ia ka ilekshon shiteng samoi.
U la ong ruh ba watla ka Left kam shym la ioh ia ka jingjop wat tang kawei ruh na ki sawtylli ki constituency, hynrei ki nongtrei jong ka ki la ngat ha ka jingshah thombor ha ki kynhun runar ba la kyrshan da ka party synshar.
Ia kane une u CM barim u la pynpaw sha ki lad pathai khubor hapoh ka headquarter jong ka party ha Agartala, kata khyndiat por hadien ba ki arkynhun ki nongmihkhmat (MLA) jong ka Left ki la leit iakynduh ia u Lat ka Tripura kumjuh ia u DGP na ka bynta ban phah ai ia ka jingujor.
Kine ki MLA jong ka Left ki la ong ba ki la don haduh palat 150 tylli ki jingjia jong ka jingiaumsnam ha ka jylla ha ka por ba la pynlong ia ka ilekshon shiteng samoi ka ba dang shu dep shen.
Nalor kata u Sarkar u la kynthoh ruh ia u DGP ka Tripura halor ka jingpulom jong ka tnat pulit ban tehlakam ia ka jinglong jingman ha ka jylla.
