Aizawl, Naitung 01: U Myntri Rangbah (CM) ka Mizoram, u Zoramthanga u la pyrto ia ka jingiateh jngsuk ka ban sah kynmaw ha ka histori ka Mizoram kum ka jingiateh ka ba seisoh tam ba la iasoi hapoh ka ri.
Ia ka lyngkhuh snem ka jingiateh jingsuk ka Mizoram (Mizoram peace accord) la rakhe ha ka jylla baroh kawei hynne ka sngi, kata hadien ar snem hadien ba la hap ban pynsangeh namar ka jingsaphriang jong ka jingpang Covid-19.
Ia kane u Zoramthanga u la pynpaw ha ka jingialang ka ba heh ba la pynlong hapoh Vanapa Hall ha Aizawl, Mizoram. Une u nongialam ka MNF u la kam ba ka ‘Mizo accord’ la shim ba ka long kum ka nuksa halor ka lynti jong ka jingsuk da ki jylla ba marjan ka Mizoram bad kiwei pat ki ri.
“Ia kane ka jingiateh jingsuk la pyrto ruh da kiwei pat ki jylla bad ki ri ka pyrthei. Ka dei ka jingiateh ka ba seisoh tam hapoh ka ri namar ym shym la don iwei ruh ki ban kieng atiar ban leh ia ki kam pyntriem na ka jylla naduh ba la ia soi ia kane k jingiateh jingsuk ha ka snem 1986,” ong une u nongialam lehnoh barim ka Mizoram u ba la kylla long u riew sain hima.
Katkum u Zoramthanga, ia ka Mizoram peace accord la iasoi ha ryngkat ki kyndon ba la pdiang da baroh arliang, kata ka sorkar pdeng bad ka MNF kata watla kam shym la long katkum ka jingangnud ba pura na ka liang ka sorkar India, ki nongshong shnong ka Mizoram bad sorkar jylla.
Nalor kata u la ong ruh ba kawei na ki jingjop ka ba khraw lyngba kane ka jingiateh ka long halor ka jingkynthup ia ka Article 371G hapoh ki riti synshar khardar ne constitution jong ka ri, kata halor ki lad jingiada na ka bynta ka jylla Mizoram.
Ia kane ka jingiateh jingsuk la ia soi hapdeng ka sorkar pdeng bad ka MNP ha ka 30 tarik u Jylliew 1986, ka ba la pynkut ia ki ka lehnoh ba arphew snem kynthoh hapoh ka thain. Ka Mizoram ka la kylla long ka jylla ka ba 23 jong ka ri India ha ka 20 tarik u Rymphang 1987.
