Shillong Naitung 21 : U Myntri ka tnad Pule Puthi Rakkam A Sangma, ula pynpaw ia ka jingngeit skhem ba u Myntri Rangbah ka Jylla Conrad K Sangma, un buddien ia ka jingtyrwa ban pynpoi lynti rel haduh Baghmara.
Kat kum ka jingong jong u, kane ka sienjam kan iarap ban kyntiew shibun eh ia ka lad kamai kajih bad iarap ruh ban pynioh kam iohjam ha ka thain.
Haba kren sha ki nongthoh khubor ha ka sngi Nyngkong, u Rakkam ula ong “Nga la dep ai ia ka dorkhas ha u Myntri Rangbah ba kyrpad ia u ban pynpoi lem ia ka lynti rel na Mendipathar sha Baghmara lyngba ka Nangalbibra lane ka Tura, Tikrikilla, Dalu bad kiwei kiwei”.
“U Myntri Rangbah Conrad K Sangma khlem pep un sa rah iakren ia kane ka jingtyrwa bad ka Sorkar India” ula ong haba bynrap ba u Myntri Rangbah u sngewthuh ia ka jingkongsan kane ka kam na ka bynta ka jingkiew ka ioh ka kot hapoh ka Jylla.
Haba kren halor ka jingkongsan ki lad pyniasoh ha ka thain kaba don ia ka khana pateng, u Rakkam ula kdew ia ka kam khaii bad ka East Pakistan kaba thnem bha hynrei da ka jingiaphiah ia ka India, kala lam sha ka jingthut ha ka khaii ka pateng.
U Myntri ula ban jur ia ki jingmyntoi ki ban wan na ka jingpyniasoh lynti rel haduh Baghmara bad ong ba ka jingpyniasoh lynti rel kan ai ia ka iew ha Bangladesh bad palat, ka ban pynlah ia ka Jylla ban pyniaid iew ia ki marpoh khyndew bad ki mar ki mata ba pynmih na Jylla.
Ula ong ba ka lynti rel kan wanrah ruh ia ka jingroi ha ki karkhana kum ha ki kam jngohkai, ka rep ka riang bad ka leit ka wan,ka ban pynduna shibun eh ia ka jingshaniah ha ki kam Sorkar.
