Shillong, Iaiong 03: U President ka United Democratic Party (UDP) bah Metbah Lyngdoh hynne ka sngi Nyngkong, ula kam ba ka UDP ka ngeit skhem ba kan ioh ia ka jingjop ha ka ilekshon MLA ha Sohiong constituency ka ban long haka 10 tarik Jymmang.
Haba kren sha ki lad pathai khubor u bah Metbah ula ong “Ngi la thikna naduh shwa ban pynbna iaka tarik ilekshon ba ki paidbah ka Sohiong constituency kin ai ka jingkyrshan iaka UDP bad lyngba ki khubor ba nga ioh lum, ngi thikna ba ka jingjop kan wan sha u kyrtong ka UDP”.
Lah ban kdew ba ka UDP kala pynbna iaka kyrteng u bah Synsharlang Kupar Lyngdoh u badei ruh u pyrsa trai u bah HDR Lyngdoh (Bam Kwai Dwar U Blei) ban long u kyrtong ha kane ka ilekshon ban wan.
U bah Metbah ula ong ba ka jingisynei ki paidbah ia u bah HDR Lyngdoh (Bam Kwai Dwar U Blei) kan ai jingjop ia u kyrtong ka UDP namar jan baroh ki paidbah ka thain Sohiong ki dang kynmaw bad ki dang burom bha iaki kam ba u bah HDR Lyngdoh u la leh ha ki por mynshwa.
Haba iadei bad ka jingdawa Common Minimum Programme (CMP) u bah Metbah ula ong ba ka Party kan sa iakren ia kane bad u myntri rangbah ka jylla u Conrad K Sangma hadien ba u wanphai na bar jylla.
U bah Metbah ula ong ba u Conrad mynta ka kynti u dang bunkam haba iadei bad ka jingpyndep iaki jingthung briew ha ki tnat treikam sorkar bapher bapher.
