Shillong, Lber 17 : Uwei u Khynnah 13 snem na Meghalaya ula iap bad 28 ngut kiwei pat ki khynnah skul, kila shitom jur na ka jingngat bih na ka bam bala ai sha ki hapoh kawei ka Hostel ba khlem pat ithuh da ki bor Sorkar, kaba la pyniaid da kawei ka skul shimet.
Une u khynnah uba iap u dei uba la tip kyrteng kum u Kerlong. Kane ka jingjia kala jia ha Gakula Vidya Samsthe kaba hap ha ka Shnong T Kagepra ha Malavalli Taluk jong ka Mandya District, ong ki Pulit.
Kine ki khynnah kila kem pang kynsan kynsan bad la pynkit ia ki sha hospital ha ka sngi U Blei hadien ba kila ud suhkpoh, kaba la jia hadien ka jingbam ia ka bam bala pynkhreh na ka bynta ka jinglehkem Holi, ong ki Pulit.
Ha ka jingtohkit, u Mallikarjin Baladandi, Superintendent of Police ula iathuh ba kane ka skul kaba la plie naduh us nem 1989, kam pat shym la ioh satia ia ka licence ban pyniaid ia ka hostel.
Ki bor pyniaid kila pyniaid beain ia ka hostel ha ka mala ba nyngkong jong ka Iingskul khlem ki jingtei ne jingdonkam kiba biang kynthup ki painkhana ia ki khynnah.
Haduh 202 ngut ki khynnah skul naduh KG haduh klas 8 kila pule ha kane ka skul bad kumba 30 ngut kiba dei na Meghalaya-kila sah ha kane ka hostel.
La kynnoh ba kane ka skul ka ju ai bam ia kine ki khynnah skul da ka bam kaba tam na ki jinglehkmen, ki iingiathoh bad kiwei kiwei na ki jaka ba marjan.
Na kine ki 30 ngut ki khynnah skul, 24 ngut ki dei na Meghalaya katba kiba tam ki dei ki trai shnong, ula bynrap.
U iathuh ba ha ka 14 tarik Lber, uwei na ki khynnah ula pyntip ia ka jingsuhkpoh hynrei ha ka sngi kaba bud, sa hynriew ngut kila ud ia ka jingsuhkpoh bad la pynkit noh mar mar ia ki sha hospital.
Hynrei ha ka sngi U Blei, u khynnah 13 snem ula kyllon bad la pynkit ia u sha Hospital ha kaba ki doktor kila pynbna ba ula khlad noh. Napdeg ki 28 ngut ki khynnah kiba poi hospital, hynniew ngut ki don hapdeng ka jingshitom kaba jur bad uwei u don hapdeng ka jingsumar bala pyndait da ki ventilator.
“Ngi la register ia ka case hapoh ka kyndon 286 bad kyndon 106 jong ka Bharatiya Nyaya Sanhita bad ngi la kem ia 3 ngut ki briew haba iadei bad kane ka jingjia” ong une u Heh Pulit.
Kine kiba shah kem ki kynthup ia u nongshet jingshet ula pynkhreh ia ka bam, u warder jong ka hostel uba sam ia ka jingbam bala sah khlem da peit la ka dang biang ne em ban biang bad ia u trai ka skul, ula iathuh.
