Shillong, Naiwieng 26 : Haduh 59 ngut ki khynnah skul jong ka Jawahar Navodaya Vidyalaya (JNV), Rymbai ha East Jaintia Hills, kila kem pang bad ioh pynhiar bad prie kynsan kynsan ia kaba la suba jur ba dei na ka jingkylla bih ka bam ba ai sha ki.
Kine ki Khynnah kila ngat ia kane ka jingshitom naduh ka 22 tarik u Naiwieng, pyntip ka Jaintia Students Union (JSU) kaba la pynrem jur ia ka jinglong khungreng ka rukom pyniaid ha kane ka skul JNV.
Namar kane, ka Union kala aipor 15 sngi ia ki borkhmih ba kin leh eiei halor kane ka kam.
Ka JSU hapoh ka jingialam u Education Secretary Khynroo Bocheru Mi Pohsnem, kala hiar leit jngoh hadien ka jingioh pdiang ia bun ki jingujor na ki Kmie Kpa bad ki Nongialam Shnong halor ka jingioh pang kynsan kynsan ki khynnah skul na ka jingngat buh na ka bam ha kane ka skul.
“(Ha ka jingjurip), u Head Boy ula pynthikna ba 39 ngut ki khynnah skul kila leit shuti ba pang, katba palat 20 ngut la pyntip ba ki dang iohpang hynne ka step” ong u samla Pohsnem ha ka sngi Balang.
U bynrap “U Medical Officer ka PHC Rymbai ula pynthikna ia ka JSU ba ka jingpynhiar jong kine ki khynnah ka dei na ka jingkylla bih ka bam. Ula pynsngew ruh ia ka jingwan man ka por kiba pang sniehdoh, kaba pyni ia ka jingbym lah bat ka skul ia ki kyndon ka khuid ka suba”.
Ka JSU kala kyntait ruh ia ka jingtyrwa jong u Principal ban pynkynriah noh ia ki khynnah skul hapoh ka 15 sngi da kaba ong ba kam sngew iahap satia ne bym lah ban long.
“Ban pynkynriah ia ki khynnah skul sha ka jaka ba dang pyntrei ia ki kam ka buh ia ka jingma kaba khraw ia ka jingshngain” ong u samla Pohsnem haba bynrap “Ka jingpyntrei ia ka phase-A (kumba T.50 klur) la dep ban pyntrei 95% hynrei kam pat don satia ia ki jingdonkam ba kongsan kum ka bording bad ki kam pynpoi um. Ka phase-B (kumba T.20 klur) ka dang dep dang 40%”.
Ka JSU kala pyntip mar mar sha u Assistant Commission of Food Safety (Jowai), uba la bthah ia u Food Safety Officer (FSO) ban leit pynlong ia ka jingtohkit ha kane ka skul.
“Ka jingpeit bniah ba nyngkong jong u FSO kala khein ia ki jingdon jingem hapoh ka campus ba kim pat biang bad bym khuid bym suba. Ka kitchen mess la shem ba isaidmet bha. Ki nongtrei kila trei khlem ki jingdeng ban iada (mask/hairnets), ki painkhana ki don marjan ka jaka bam bad ka umdih la shem ba ka long kaba jngut. Tang artylli ki RO machine kila shakri ia 200 tam ki khynnah skuk” kala ong.
Ka JSU kala aipor 15 sngi ia ka bor khmih ba kin pynbeit ia ka khuid ka suba bad ka umbam umdih kaba khuid ha kane ka campus ba mynta.
“Ka jingbym lah ban leh ia kine kan pynbor ia ka Union ba kam shim ia kiwei pat ki sienjam ha kaban ai jingiada ia ki khynnah skul” ong u Education Secretary.
, Rymbai ha East Jaintia Hills, kila kem pang bad ioh pynhiar bad prie kynsan kynsan ia kaba la suba jur ba dei na ka jingkylla bih ka bam ba ai sha ki.){kind=link}