Shillong, Jylliew 11 : Ka Sonam Raghuvanshi kala byrngem lypa ia ki bahaiing hasem ba pyniathoh jubor ia ka bad u Raja Raghuvanshi da kaba ong “Ngan iathoh ia u Raja Raghuvanshi hynrei sa peit ngan leh aiu ia u”.
Ka Sonam kala don jingiadei bad u Raj Kushwaha, uba dei u nongtrei jong u Iing ka Sonam, ia uba ki Kmie Kpa kim sngew tynnad satia namar ba kumno kin pyniashong kurim iala ka khun bad u nongtrei.
Ia kane la pyntip da u hynmen u Raja, u Vipin Raghuvanshi uba la iathuh ba ka Sonam kala dep pyntip iala ka kmie ba ka don jingiadei bad u Raj hynrei ka Kmie kala pyrshah jur.
Ka Sonam kala byrngem ia ki bahaiing ba kan mih kaei kaei kabym sngewtynnad lada pynbor ia ka ba kan iathoh bad u Raja Raghuvanshi, uba la shah pyniap tang khyndiat sngi hadien ka jingiakyntiew kurim bad kane ka briew, ong ki Pulit.
“U Vipin ula iathuh ba ka Sonam kala dep pyntip ia ka Kmie ba ka don jingiadei bad u Raj. Ka ong ba kam kwah ban iathoh bad u Raj. Hynrei ka Kmie,kala pyrshah ia kane ka jingiadei bad u Raj bad kala pynbor ia ka ban iathoh” ong ka khubor.
“U Vipin ula kynnoh ba ka Sonam kala mynjur ban iapein bad ban iathoh ia u Raj hynrei kala maham lypa ba kan sa mih kaei kaei ka bym sngewtynnad. KA ong ‘phin sa iohi ia kaei kaba ngan leh ia une u briew. Phin hap ban mad ia ki jingsngewsih baroh’. Ym don ba poi pyrkhat ba kan pyniap ia u Raja” la bynrap.
U Vipin ula kynnoh ruh ba ka Sonam kala iasah ha kawei ka hotel bad u Raj hadien ka jingpyniap ia u Raja. Hadien kane, ula phah ia ka ba kan leit shala ka jong ka Shnong ha Indore, Madhya Pradesh, bad hangne kala sah arsngi.
Nangne pat kala mih bad kala leit sha Ghazipur bad dei da ka jingiohkem ki Pulit ia u Raj bad ia ki 3 ngut ki nongpyniap, ka Sonam kala mih pyrthei bad aiti ialade sha ka Ain ha Nandgank Police Station, Ghazipur District, Uttar Pradesh.
Ka khubor Pulit ka iathuh ba ka Sonam kala thong haduh T.20 lak ban pyniap ia u Raja. Ka khubor ka iathuh ba kine ki nongpyniap kila iakynduh nyngkong eh ia kine ki shijur ba dang shu dep iathoh ha Bengaluru bad nangne kila wan da ka liengsuin sha ka thain Shatei Lam Mihngi.
