Shillong, Jymmang 10: U Working President ka United Democratic Party (UDP) Bah Paul Lyngdoh, hynne ka sngi balang ula pynpaw ba um don satia kano kano ka jingpyrwa halor ka jingsaphriang ki hamasai ba un shah weng noh kum u Myntri ka sorkar jylla.
Halor ka jingkylli ba bun kila iakren bha, ba u Bah Paul Lyngdoh u lah ban shah weng noh kum u Myntri Sorkar hadien ka MLA Election ha Sohiong, Bah Paul ula ong, “Bun ki briew ki lah ban kren bun jait, ngi don hangne ban shakri na ka bynta ka bha ka miat jong ka jylla, nga dei u briew u bym ju pyrwa eiei ia kum kitei ki jingkren hamsaia”.
Nalor kane u Bah Paul Lyngdoh ula kyntait ruh iaka jingsaphriang ki khubor ba kan don ka jingkylla haka sain pyrthei khamtam ia ka jingiadei hapdeng ka UDP bad NPP, hadien ba la dep ka elekshon ha Sohiong Constituency.
“U Briew uba kren ia katei, un dei u briew uba biang tam ban ai ia ka jubab” ong u Bah Paul.
Dang shen u Symbud Myntri Rangbah ka jylla Bah Prestone Tynsong ula ai ksai ba kan sa don ka jingkylla haka kam sain pyrthei hadien ka 13 tarik u Jymmang hadien ba la dep ban pynbna iaka result jong ka Election ha Sohiong.
“Dei ban burom ia ka rai jong u paidbah ha 2023 bad katei ka jingrai kadei da kaba ai 26 ngut ki MLA iaka NPP, hynrei kim shym la lah pat ban thaw hi marwei ia ka sorkar, ki paidbah kila ai ruh iaka rai da kaba jied ia ki 11 ngut ki MLA na ka UDP. Haba khmih bniah iaka Result donkam ban khmih bniah ha man la ki thain, ha kaba ki Garo kila jied ia ka NPP bad ki Khasi Jaintia pat kila jied ia ka UDP” ong u Bah Paul.
Haba kylli la ka don ka jingwan khroh na ka NPP iaka UDP ban pyniasoh noh bad ka, u Bah Paul ula jubab da kaba ong, “Bun ki lah ban kren ia kiei kiei ha ki rynsan ialap elekshon”.
