Ngam pyrshah ia ka seng, nga pyrshah ia ka rukom treikam ka seng

Ka jingsuspon 3 snem ia nga ka long kumba shah beh na ka seng VPP:Adelbert Nongrum

Shillong, Iaiong 04 : U MLA ka North Shillong Constituency u Bah Adelbert Nongrum, hynne ka sngi Thohdieng ula ong ba ym pdiang ia ka jingpynmih hukum ka seng Voice of People Party (VPP) ban weng shipor ia u na ka jinglong dkhot (suspension) na ka seng VPP bad ula ong ba ka jingshah suspon ka jongu 3 snem ka long thik kumba beh seng.

Dang shen ka VPP ka la pynmih ia ka jingpynbna ba kala suspend ne weng noh ia ka jinglongdkhot ia u Bah Adelbert Nongrum bad ia ki 4 ngut ki nongialam ka seng VPP halor ka nongrim ba kila ialeh pyrshah ia ka seng.

U Bah Adelbert Nongrum haba iakren bad ki lad pathai khubor, ula ong ba ha shwa ka elekshon MDC ula dep ban kyrpad ia u President ka VPP u bah Ardent Miller Basaiawmoit ban khot iakren ban pynbeit ia ki jingbym iaid beit hapoh ka seng hynrei u President ula ong ba ym don por namar ka jingbun kam elekshon, hynrei kaba khraw hi ha katei ka por kadei ban ia pynbeit shwa ia ki kynrum kynram hapoh ka seng.

U Bah Adelbert ula ong ruh ba ka jingpynbna ka seng ban sa pynbeit ia ka kam ka jongu ynda la dep ka elekshon MDC kadei tang namar ba ki tieng ioh ka ktah ia ka seng VPP ha ka elekshon, hynrei kila dep pat ban rai lypa ban weng noh bad ki sa shu pynbna mar ia dep ka elekshon.

Ula pynshai ba ym shim la mih na ka seng bad u khlem leh kaei kaei kaba kin pynbud nam ia ka seng bad ym pyrshah ia ka seng hynrei kaei kaba u pyrshah kadei tang ia ka rukom pyniaid ia ka seng, namar kila iaid lait ia ki kyndon jongka seng hynrei kan shong pat ha ki paidbah ba kin bishar ia kane. Hynrei haba kila wit ia u kila dei ban pynmih syndon na ka seng hynrei kila shu weng shipor ia u kum u dkhot ka seng.

“Ki lah ai ia ka Show Cause da ka jingthoh bad nga ruh nga lah ai da ka jingthoh, hynrei kumno ki hun kein haba nga lah donbynta lang ban pynlong doh pynlong snam ia ka seng VPP. Kane ka jingsuspon ka jongki 3 snem ka thew kumba ki lah beh ia nga” ong u Bah Adelbert.

Ula pynkynmaw ba ula pynpaw ba u kwah ban rung sha ka seng kaba ym kwah ban mih shuh, sa tang lada ka don ka dawbah hynrei haduh mynta ym pat lah ban pdiang ia ka jingshah suspon ha ka seng VPP.

“Watla ka party kumba ka long ka paw kumba kala beh ia nga hynrei lada ngam ioh shuh ban kren ha ka kyrteng jong ka seng VPP hynrei ngan nang iai kren pat ha ka kyrteng Voice of the People ne sur jong u paidbah” ong u Bah Adelbert.

Nga rung ha ka VPP ha ka nongrim ym ban pan tiket

“U Paidbah um dei ban klet ba ha ka por ba nga rung sha ka VPP nga rung ha ka nongrim bad nga khlem rung ruh ban pan tiket. Nga rung bad nga ong ia ka VPP ba lada ka pdiang ia ka Reservation Policy ngan rung sha ka VPP bad kila ong hooid. Hynrei u paidbah ula shah ialam bakla bad long shongshit biej. Nga kyrpad bad kyntu ia phi ba ka don ka por ia kiei kiei baroh, sngap bad puson bad sa bishar ma phi la kadei ba phin bein ne iaroh, namar nga shym la wan ban pynksan ialade ne ban pynrem ia kine ki paralok. Ngan shu ong tang ia kane kawei, ma ki kiba pynkhein ia ka jingiakut. Ka State Reservation Policy kam dei ka ishu ka jong u Bah Adelbert Nongrum, kadei ka ishu jong ki samla bad ka jylla, hynrei balei na ka liang ka seng ka ai jingmut sha ka State Exepert Committee tang ia ka Job Reservation on Population. Nga lah kylli ia ki, shaei ka Academic Reservation bad shaei kata ka Roster kaba ngi dawa ba kadei ban treikam noh nangne shakhmat ym da kaba treikam naduh mynshwa. Ngi hap ruh ban rah ia ka mat halor ka Creamy Layer, kumno u khun jong u MLA un iakhun pyrshah ia u khun uba die waidong haka Reservation Policy balei ka party kam sngewthuh sieh, ki don ki riewstad ki riewnang, ki don ki riewheh kyrdan, hynrei kadei tang kawei ba kim kwah ia nga uba kren ba ngan iai kren” la ong u Bah Adelbert.

Ula ong ruh, “Balei nga leit iaid lait, lada ia ka jingiatehkular jong ka jaidbynriew la pynkhein kumno ngan shaniah pat ia ki. Nga khlem mih na ka party ne leh ia kaei kaei kaban pynbudnam ia ka party hynrei nga leh ia kiei kiei ban wanrah bad ban kyntiew ia ka jylla bad ia ka jaidbynriew bad ban iohnong ruh ka VPP. Wat nym ialam bakla, ngam long uba ialeh pyrshah ia ka seng hynrei nga dei uba ieng pyrshah tang ia ka rukom treikam namar ki iaid lait na ka riti treikam jong ka seng, dei ma ki kein kiban sngewthuh ban bishar bad ngam dei ma nga uba pynkhein iaka riti treikam ka seng”.

U Bah Adelbert ula ong, “Ba ngan ym hun ne pdiang, lada phim khot ia ngi markhmat, ka suspension ka shong ha phi, hynrei lada phi shah ia nga, ngan kyrpad ba phin pyrkhat biang da kumwei ia kane ka jingsuspon. Khot ia ngi ngin iakren haba shit haba shai bad kum ki rangbah bad ngin ia kren lang bad lada kadei ba nga bakla ngan pan map, ngan dem ngan nguh ia kita ki briew kiba kwah ia kata na nga. Hynrei lada phi bakla ma phi kam pher, ngan shu ong ngin ia map noh bad ngin ia klet noh”.