Nongpoh, Naitung 11: U wei u rawon u la iap na ka jingngam jyllop ha ka dam 9 nombor jong ka MeECL kaba don ha ka thain Nongmahir.
Kane ka jingjia ka la jia ha ka nohphai sngi jong ka 9 tarik u Naitung.U ne u rangbah briew uba iap jyllop u kyrteng u Shiningstar Kharpati, uba dei na ka shnong Umpling, East Khasi Hills District.
Katkum ka jingtip ba la iohlum, la iathuh, ba u ne u rangbah u la leit sha katei ka jaka ban ia khwai dohkha ha ryngkat ki arngut ki paralok ba kynthup ia u Malkos Lyngdoh bad Micheal Warjri kiba dei na kajuh ka shnong.
La iathuh ruh, ba ha katei ka jaka, kine ki 3 ngut shiparalok ki la thaw ruh ia ka jaka rieh tngen (tent) harud ka pung namar ka jingjur slap bad ka jingjur ka lyer, hynrei sniewbok ha ka por ba kitei ki arngut ki dang bunkam ka shet jingshet, katei ka ingriehtngen (tent) ka la shah rong ha ka lyer shapoh ka pung Umiam bad kumta u Bah Shiningstar u la ryngkoh shapoh pung ban leit sei ia ka tent hynrei u la ngam jyllop noh ialade.
La iathuh ba ki paralok kiba la iohi ia kane ka jingjia, ki la pyrshang ban leit ai jingiarap da kaba pyrshang ban tan da u wei u siej hynrei kim shem la lah satia tad haduh ba u tei u rangbah u la ngam jyllop.
Ki Pulit ka Kyrdemkulai Police Outpost mar ia ioh jingtip ia kane ka jingjia, ki la leit sha katei ka jaka ban tohkit bad da ka jingiarap ki pulit ka Special Rescue Team Shillong, la ioh ban sei ia ka met iap bad la rah sha Nongpoh Civil Hospital ban leh ia ka post mortem.
Pule lang ia kane: Assam: Wan phetrieh haduh 133 ngut ha Dhubri namar ka kam iaumsnam ha West Bengal
