NEP 2020: Mynjur ki College Shillong ia ki jingmyntoi ka NEP hynrei mih ka jingkylli halor ka jingpynkhreh

Shillong, Naitung 31 : Namar ka jingpynkhreh jong ka North Eastern Hill University (NEHU) ban pyntreikam noh ia ka National Education Policy-2020 naduh u Nailar 2023 bad bthah ia ki College ba kin bud ryntih, kiba bun ki College ka Nongbah Shillong kila pynkhreh shaid shaid ban jam sha kane ka jingkylla hynrei ki don ruh kiba sngewkhia halor ka jingpynkhreh jong ki namar ka jingduna ki jingdonkam baroh.

Ka Shlem kala ioh ban iakren bad ki Principal jong ki College bapher bapher ha Nongbah Shillong ba tip ia ka jingpynkhreh jong ki bad ki jingeh ba kin iakynduh na ka jingpyntreikam ia ka National Education Policy-2020.

I Principal ka Shillong College Dr Evakorlang Kharkongor ila pynpaw ba ka Shillong College kala long kaba khreh ban pyntreikam ia ka NEP jong ka Four Year Undergraduate Programme (FYUP).

Kat kum ka jingong jong I, ka College kala dep thaw ia ka Task Force naduh u snem 2021 bad kala pynkhreh shaid shaid ban jam sha kane ka jingkylla.

Halor ka jingshemphang ia ka NEP, ila ong ba ka College kala dep shim ia ki sienjam ban pynthikna ba ki Nonghikai bad ki samla pule kin tip bha shaphang kane ka jingkylla.

I Dr Kharkongor ila ban jur ruh ia ki jingmyntoi jong ka NEP-2020 ka ban ailad ia ki samla pule ba kin ioh ia ki syrnot, ki diploma bad ki degree ha ki kyrdan pule bapher bapher kat kum ka jingkwah jong ki. Watla tip ia ki jingeh ki ban mih, ila iai ban ba ka College ka long kaba la khreh ban iakhun pyrshah ia ki.

Ila pynpaw ia ka jingkyrmen ban lah pynbeit noh ia ka jingbym iahap jingmut hapdeng ka NEHU bad ka MCTA khnang ba baroh kin iadonlang ha kajuh ka lieng na ka bynta ka bha ka miat jong ki samla pule.

U Br. Albert Dkhar, Principal ka St. Anthony’s College, Shillong ula pynpaw ia ka jingdonkam ban hap da bishar bha ia ka jingpyntreikam ia ka NEP. Namar ba ka Academic Session ba thymmai kan sdang naduh ka 8 tarik Nailar, ka College ka dang ap ia ka jingbthah na ka Sorkar Jylla bad ka NEHU, ula ong haba pynpaw ba ka don ruh ka jingsngewkhia halor ka pla tyngka naba ka College kan hap ban thung nongtrei thymmai bad air uh ki jinghikai pyntbit ia ki Nonghikai ba kin lah ban ai jinghikai ia ki katto katne ki sobjek.

U Br Dkhar ula pyntip ba ula leit iashibynta ha kiba bun ki jingialang bad ka University ban pynbeit ia ki syllabus hynrei kam pat shym la don satia kano kano ka jingshimrai halor ka jingpyntreikam kloi noh ia ka NEP-2020.

Ha kajuh ka por, ka Bormanik College ha Nongkseh, Upper Shillong kala iatakhuh ia ka jingpher ba khampher ban ia kiwei ki jaka pule shabar ka Shillong. Wat hapdeng ki jingeh kiba bun, I Principal D Rumnong ila pynpaw ia ka jinglong ba kloi jong ka College ban mad ia ki jingeh ba iadei bad ka NEP-2020.

I Kong Rumong ila pynpaw ba ka syllabus ka dei kaba lah ban pyntreikam hynrei ka College ka la pan por na ka NEHU ba kan lah ban pyntreikam ia kane ka Policy ba thymmai. Ka jingduna pisa ka dei kawei ka jingjia namar ka college ka donkam ban thung briew ha kaban lah pyniaid beit iaid ryntih ia ki kam kat kum ki jingpynkylla.

Hynrei I Kong Rumnong ila ban jur ba ka NEP-2020 ka tyrwa ia shibun ki jingmyntoi khamtam ha kaban tehlakam ia ka jingieh shiteng por jong ki samla ia ka jingpule. Da ka jinglah ban ai syrnot ha ki kyrdan pule bapher bapher, ka policy ka pynshlur ia ki samla ba kin bteng ia ki jingpule bad ban nang kiew hala ka jong ka jinglah.

Dang shen, u Myntri ka kam Pule Puthi Rakkam A Sangma ula pyntip ba 33 tylli ki college ha Meghalaya kila pynpaw ia ka jingbym pat lah ban pyntreikam ia ka NEP-2020 naduh kane ka samoi pule ba mynta.

Lah ban kdew hangne ba ka MCTA kala bthah ia ki Dkhot ba kin Boycott ne sangeh ia ka jingleit shim klas ia ki samla pule jong ka kyrdan 1st semester naduh ka 1 tarik Nailar 2023 kum ka jingpyrshah ia ka rai ka NEHU ban pyntreikam syndet syndet ia ka NEP 2020.

Pule ruh: Jan mih ka jingkulmar ha Khanduli shuwa ka jingleit iuhkjat ki CM ka Meghalaya bad Assam