Shillong, Dec 20: U Myntri Khynnah ka DoNER, u Dr. Sukanta Majumdar u la khot ia baroh ki kynhun ba don bynta, ban peit shabar jong ki jingeh kiba la don lypa bad ban iatreilang ha ka ban lah pyndonkam ia ka sap kaba khraw jong ka thain Shatei Lam Mihngi.
“Da kaba wanrah ïa ki jingïatreilang kiba khlaiñ hapdeng ki Ministry ka Sorkar Pdeng bad ki Sorkar Jylla, ngi lah ban thaw ïa ki lad ki lynti kiba kynthup lang, kaba lah ban neh, bad kaba ïahap bad ki jingangnud jong ki paidbah ka thaiñ,” u la ong ha ka sngi shuwa ban sdang ka Dorbar bah ba 72 jong ka North Eastern Council (NEC).
Mynta ka sngi la pynlong ia ki jingialang ba bun jait ha kaba la iakren ia ki mat kiba tynjuh ia ka thain Shatei Lam Mihngi. Kane ka Dorbar bah ka ban pyniaid da u Myntri kam Pohiing Amit Shah lashai ka sngi ha Agartala, kan wanrah lang ia ki nongshim bynta ba kongsan na ki tnad ka sorkar pdeng, ki sorkar jylla, bad kiwei kiwei ki tnad ba kongsan.
U Myntri Khynnah ka DoNER Dr Sukanta Majumdar, u la pynpaw ia ka jinglong kongsan jong ka thain Shatei Lam Mihngi ka Ri India bad ong ba ka thain ym tang ba ka long ka spah bah ha ka rukom long ki jaka puta hynrei ka dei ka pyrnon kaba pyniasoh ia ka Ri India bad ki Rib a marjan kum ha China, Myanmar, Bangladesh, Bhutan, bad Nepal.
U Dr. Majumdar u la pynpaw ïa ka jingangnud jong ka Sorkar India ban ïoh ïa ka jingroi kaba mar katjuh, kaba neh, bad kaba kynthup lang ïa baroh ha kane ka thaiñ. U la kdew ba hapoh ka jingïalam jong u Myntri Rangbahduh ka ri u Narendra Modi, ka roi ka par kala kiew bha ha ka liang ki jingtei, khamtam ha ki lynti liengsuiñ, ki lynti rel, bad ki lynti na duriaw. Ka Skhim North East Special Infrastructure Development Scheme, kaba ai 100% ka jingbei tyngka na ka Sorkar pdeng na ka bynta ki projek kiba kongsan, ki dei ki kam kiba la wanrah ia ka jingkylla ha ki lad pyniasoh, ki kam jngohkai bad ki jingtei ba kongsan ha ka imlang sahlang.
U la pynleit jingmut ha kaban pynjanai ïa ki lad pyniasoh lyngba ki prokram kum ka SARDP-NE, Bharatmala-I, bad ka East-West Corridor. U la ban jur ia ka jingthmu jong ka Sorkar ban pynthikna ia ka jingiadei jong ki myntri bad ka thain, da kaba pynpaw ba 74 ngut ki Myntri Sorkar Pdeng ki la leit jngoh ia ka thain shatei lam mihngi palat 157 sien hapdeng u bnai Jymmang 2023 bad u bnai Risaw 2024. Kane ka jingthmu, u la ong, ka thmu ban pynioh ia ki skhim sorkar kat kum ki jingangnud jong ka thain, ka ban pynthikna ia ka jingpyntreikam kaba kham bha ia ki prokram ka sorkar pdeng.
U Chanchal Kumar, Secretary ka DoNER, u la pynthikna ia ki heh sorkar ba ia ki jingeh ba la pynpaw da ki nongmihkhmat jong ka jylla la buh jingthoh bha bad yn sa pynbeit ha ka jingiatreilang bad ki tnad treikam bapher bapher ka Sorkar Pdeng.
