Shillong, Naiwieng 14: Ka Manipur bad ka Arunachal Pradesh kin iakynduh ha ka jingiakhun phainal jongka U-17 ki kynthei ha ka North East Olympic Games hadien ba kila jop ia ka jingiakhun semi phainal hynne ka sngi nyngkong ha madan Polo.
Ha ka jingiakhun ba nyngkong, ka Manipur kala pynliem ia ka Mizoram da 2-0 kol katba ka Arunachal Pradesh kala beh nadien ban jop ia ka Sikkim da 5-1 kol ha ka jingialehkai kaba ar.
Ka shimpor tang 35 minit ia ka Manipur ban ioh ia ka kol ba nyngkong bad ia kane la ioh thep da ka captain ka H Shilky Devi. Watla ka Mizoram kala pyrshang ban pynphai, hynrei kam shym la lah thaw pyrthei. Ia ka kol kaba ar la ioh thep da ka Luxmi Devi ha ka minit ba 9+3 minit.
Ha ka jingiakhun jong ka Sikkim bad Arunachal Pradesh, ka Sikkim kala ioh ban thep ia ka kol ba nyngkong ha ka minit b alai hynrei ka Arunachal Pradesh kala ioh ban pynphai tang hapoh ka 10 minit ban iakhaid lyngba ka kol jong ka Kai Rumi ha ka minit ba 12 bad la pynbud saka kol ka Angel Tayang ha ka minit ba 41 shuwa ban kut ka kylla sted.
Ha ka kylla miet, ka Arunachal kala ioh ban thep biang sa lai kol lyngba ki kol jong ka Gianai Ramching Mara (57′), Rumi (71′) bad ka Tayang (88′).
Ka jingiakhun phainal kan long ha ka sngi Balang hynrei ia ka por yn sa pynthikna.
Lashai ka sngi kan don ka jingiakhun ia ka takma rnong hapdeng ka Nagaland bad ka Manipur ha ka jingiakhun kong ka U-21 ki shynrang shuwa ba ka Mizoram kan iakhun pyrshah ia ka Sikkim ha ka por janmiet.
