Nongstoiñ, Rymphang 11: Ka kynhun ïalehkai jong ka Khliehmawlieh Youth Club ka la rah biang ïa ka nam lahduh ha ka lympung ïalehkai NDSA Premier League Football Tournament 2023-24 ha ka Super Division, katba ka Nongstoiñ Football Team ka la ïoh ban khur ïa ka nam lahduh ha ka 1st Division.
Ha ka kyrdan 1st Division ka Nongstoiñ FT ka la ram ïa ka nam lahduh, hadien ba ka la lah ban pynliem noh da san kol la saw kol pyrshah ïa ka Mawiong Pyndengrei lyngba ka jingïashut tie breaker, hadien ka jingïakhaid da mar ar kol ha ka jingïalehkai final kaba la long ha ka sngi saitjaiñ jong ka taiew ha madan NDSA Nongpyndeng.
Katba ha ka Super Division pat, ka Khliehmawlieh YC ka la rah ïa ka nam lahduh hadien ba ka la lah ban pynïakhaid khlem da don mano mano ba ïoh ban thep kol ha ka jingïakhun kaba khatduh pyrshah ïa ka Pyndengrei SCSC.
Lyngba ka jingïakhaid ha katei ka jingïakhun ka Khliehmawlieh ka la ïoh ban khur haduh 23 point katba ka Pyndengrei SCSC ka la ïoh 20 point. Kumta ka Khliehmawlieh ka la khur ïa ka nam lahduh na ka lympung jong ka League baroh kawei.
Ha katei ka sngi ba pynhap pyrda ïa katei ka lympung ïalehkai, ki nongkitkam ka NDSA ba kynthup ïa u Bah B.S Kharlor president ka NDSA bah Mt. Gordon Marngar Secretary ka NDSA, Dr L.L.Mawsor Chairman Footbal Committee, bah G.J.L.Sangriang dkhot jong ka Football Committee bad kiwei kiwei ki la sakhi lang bad shim ruh ïa ka bynta ban sam ïa ki khusnam bapher bapher sha ki rang ïalehkai.
Ha ka Super Division, ïa ka nam Best Player la ïoh ban khur da u Silbanus Diengngan na Uper New Nongstoiñ, Best Goal keeper la ïoh ban khur da u Khlaiñborlang Wahlang na ka Pyndengrei SCSC, Top scorer la ïoh ban khur da u Living Nongrang na ka Khliehmawlieh YC, katba ïa ka nam emerging player la ïoh ban khur da u Bankerlang Lyngkhoi na ka Tiehsaw Pengkyllut SC.
Shuh shuh, ha ka First Division ïa ka nam Best player la ïoh ban khur da u Rishandapbon Marweiñ na ka Nongstoiñ FT, Best Goal keeper Pynshaibok Kharit na ka Mawiong Pyndengrei SC, katba ïa ka nam emerging player la ïoh ban khur da u Evershine Kharbani na ka Nongstoiñ FT.
