Pynliem 11-0 kol ia ka Uttarakhand
Nongpoh, Nailur 22 : Ka Kynhun ialehkai phutbok ki Khynnah Kynthei U-17 ka skul Saiden Secondary School, kila jam mynta sha ka Quarter Final jong ka lympung National Level Inter School Subroto Mukherjee Cup.
Kane ka kynhun ialehkai kaba dei ka lahduh ha ka U-17 ki Kynthei ha Jylla, kala pynliem ia ka kynhun ialehkai jong ka Uttarakhand da 11-0 kol ha ka jingiakhun ba long hynne ka sngi Thohdieng ha Nongbah Delhi.
Kane ka jingioh rung sha ka Quarter Final kala wan ruh hadien ka jingjop ia baroh lai tylli ki Kynhun ialehkai kiba don ha ka Group Poll G ba kynthup ia ka Goa, ka KVS Dehradum bad ka Uttarakhand.
Ka Saiden Secondary School haduh mynta kam pat shah thep wat tang shi kol ruh ha kane ka lympung ialehkai phutbol ba heh duh jong ki skul hapoh ka Ri India.
Ha ka jingialehkai ba nyngkong eh, ka Saiden Secondary School kala iakynduh bad ka kynhun ialehkai ka Goa bad ha kane ka jingiakhun, kane ka kynhun ialehkai ka Ri-Bhoi District, kala pynliem ia ka Goa da 2-0 kol.
Ha ka jingialehkai pyrshah ia ka KVS Dehradun, ka Saiden Secondary School kala pynliem da 4-0 kol. Kine ki jingjop kila pynkamai haduh 9 point ba dap pura, kaba pynjam da kaba suk ia ka kynhun sha ka Quarter Final.
Kane ka kynhun na Ri-Bhoi kan ap mynta ia ka jingiakhun quarter final ha ka 24 tarik Nailur ka ban long pyrshah ia ka kynhun NCC Mizoram. Kane ka jingiakhun kan long ha Ambedkar Stadium, New Delhi.
Hadien kine ki lai tylli ki jingiakhun, ki thei ialehkai ka Saiden Secondary School kiba la ioh ban thep kol ki dei ka samla Eiladki Ksoo kaba la ioh thep haduh 6 kol, ka Imaia Shylla-5 kol, ka Daiamon Makhroh-3 kol, ka Danishisha Lyngdoh, ka Barikor Kurbah bad ka Daphishisha Syngkli kiba ioh mar 1 kol.
